Шаҳрам Ғиёсов Альварес - Бивол оқшомида рингга кўтарилиши мумкин

Ҳамюртимиз катта эҳтимол билан навбатдаги жангини май ойида, яна ҳам аниқроғи 7 май куни Лас-Вегас шаҳрида ўтказиши мумкин. Шу куни ярим оғир вазн тоифасида WBА чемпиони Дмитрий Бивол ҳамда суперўрта вазнда мутлақ жаҳон чемпиони Сауль Канело Альварес ўзаро тўқнаш келишади. 

Ушбу катта бокс оқшоми АҚШнинг Лас-Вегас шаҳридаги «Т-Мobile» аренада бўлиб ўтади. Шаҳрамнинг менежерлари унинг бўлажак бокс оқшомидаги иштирокини таъминлаш учун ҳаракатларни бошлаб юборишган. Куни кеча Ғиёсов olamsport.com сайти меҳмони бўлди ва ҳамкасбимизнинг шу мазмундаги саволига қисқа қилиб "Бўлиши мумкин" дея жавоб берди.     

Эслатиб ўтамиз, Шаҳрам Ғиёсов ўтган йилнинг 17 декабрь куни Тошкентда ташкил этилган катта профессионал бокс оқшомида аргентиналик Кристиан Кориага қарши рингга кўтарилганди. Ўша жанг тўлиқ давом этган ва якунда боксчимиз очколар ҳисобига кўра ғалаба қозонган эди.

Шаҳрам Ғиёсовнинг Канело - Бивол оқшомида жанг ўтказиши ҳозирча расмий маълумот эмас. Тез кунда бу ҳақида батафсилроқ хабар берамиз.