Шаҳрам Ғиёсовдан қочаётган Ромеро турли баҳоналарни рўкач қилишда давом этмоқда

Роландо аввалроқ чарм қўлқоп устамизни танимаслигини айтиб, бутун дунёни ажаблантирган эди. У бу сафар нима учун ўз вазнида янги WBO чемпиони Девин Хейни билан бирлаширувчи чемпионлик жангида рингга чиқишни истамаётганини тушунтирди. 

Ўтган йилнинг май ойида Ромеро Райан Гарсияни мағлубиятга учратиб, WBA чемпионлик камарини қўлга киритганди. Хейни ноябрь ойида Саудия Арабистонида ўтган турнирда Брайан Норманни таслим этиб, WBO чемпионига айланган эди.

"Девин мени жангга чақирмади, - деди Ромеро Fight Hub TV каналига берган интервьюсида. - Райан билан жангдан кейин нега мени жангга чақиришмади? Норман билан жангдан кейин нега мени жангга чақиришмади? Нега улар Саудия Арабистонидан кетгунларича бир неча кун кутишди? Билмадим, буларнинг бари менга ғалати туюляпти.

Хейни ўтган йили Гарсияга ютқазган, аммо кейинчалик Гарсиянинг ижобий тести туфайли жанг натижаси бекор қилинган ва Хейни Гарсияга қарши фуқаролик даъвосини судга берган. Ромеро, Гарсия ва Хейнининг фикрича, иккинчи жанг масаласини ёпиш керак.

"Биласизми, менимча, Девин Райан билан иккинчи жангни ўтказиши керак, чунки мендан реваншда ёрдам беришимни сўрашди ва мен бу сўровни бажардим, - дея қўшимча қилди Ромеро. - Райан ҳаммамизга яхшилик қилиши ва Девинга реванш бериши керак, чунки мен уни нокаут қилганимдан кейин икки йил судлашишни хоҳламайман. Вақтимни бекорга сарфлаб нима қиламан".

Эслатиб ўтамиз, Ромеро чемпионлик камарининг биринчи ҳимоясини афсонавий Мэнни Пакьяога қарши ўтказишни режалаштирган эди, аммо музокаралар самарасиз якунланди. WBA тез орада Ромеродан мажбурий даъвогар Шаҳрам Ғиёсовга қарши жанг ўтказишни талаб қилиши мумкин.