14 мар 09:28
Янгиликлар

Теннис

Шарипова Чин юрти турниридаги иккинчи учрашувини ўтказди

Хитойнинг Шэньчжэнь шаҳрида теннис бўйича Pingshan Open турнири давом этмоқда.

Соврин жамғармаси 60 000 АҚШ долларини ташкил этувчи мусобақада ҳамюртимиз Сабина Шарипова ҳам иштирок этаётган эди. Афсуски, мамлакатимизнинг биринчи рақамли теннисчиси яккаликнинг иккинчи давра учрашувидаёқ ўз иштирокини якунлашга мажбур бўлди.

Pingshan Open турнирида иккинчи рақам остида сараланган вакиламиз биринчи босқичда хитойлик Ми Ксу Вудан устун келганди. Бундан бир неча дақиқа аввал якунланган иккинчи давра баҳсида эса у германиялик Сара-Ребекка Секуличга 3:6, 2:6 ҳисобида имкониятни бой бериб қўйди.

Таққослаш учун, Сабина Шарипова WTA рейтингида 138, Секулич эса 403-ўринни эгаллаб турибди. Бу теннисчиларнинг ўзаро илк учрашуви бўлди.