Sharjah Masters 2025. Гроссмейстерларимиз 5-турда қандай натижа қайд этишди?

Мукофот жамғармаси 73 000 АҚШ долларини ташкил этувчи ушбу мусобақанинг кучлилар жам бўлган "Masters" гуруҳида тўрт нафар гроссмейстеримиз - Нодирбек Абдусатторов, Жаҳонгир Воҳидов, Муҳиддин Мадаминов ва Ортиқ Ниғматов ҳам совринли ўринлар учун баҳс олиб боришмоқда. 

Кеча мусобақада 5-тур учрашувлари бўлиб ўтди. Нодирбек Абдусатторов қора доналарда венгриялик гроссмейстер Адам Козак билан дуранг ўйнади. Ушбу баҳсдан бир неча соат ўтиб, афсонавий Магнус Карлсенга қарши онлайн матч кутиб тургани боис, Нодирбек ғалаба учун таваккал қилмади. Ортиқ Ниғматов оқ доналарда рейтингда ўзидан юқорида турган ҳиндистонлик Картик Венкатараман билан муросага келди. 

Афсуски, Sharjah Masters 2025 турнирининг 5-турида Муҳиддин Мадаминов ва Жаҳонгир Воҳидов оқ доналарда ҳаракат қилганларига қарамай, рақибларига имкониятни бой бериб қўйишди. Мадаминов қозоғистонлик тажрибали гроссмейстер Ринат Жумабаевга, Воҳидов эса эронлик гроссмейстер Моваҳед Синага ютқазиб қўйди. 

Олтинчи тур олдидан хитойлик Даи Чангрен, нидерланиялик Аниш Гири ва сербиялик Александар Инжич 4 тадан очко жамғариб, 1-3 ўринларни банд этишган. Ўн уч нафар иштирокчи 3,5 тадан очкога эга. Улар орасида Нодирбек Абдусатторов ҳам бор. Ҳамюртимиз қўшимча кўрсаткичларга кўра 13-ўриндан жой олган. Ортиқ Ниғматов 3 очко билан қўшимча коэфицентларга кўра 24-поғонани банд этган. Муҳиддин Мадаминов 1,5 очко билан 72, Жаҳонгир Воҳидов эса 1 очко билан 79-поғонада бормоқда.