Шавкат Мирзиёев - Ўзбекистон Миллий Олимпия қўмитаси президенти, Отабек Умаров эса 1-вице президент!

Тадбирда Ўзбекистон Республикаси Бош вазири Абдулла Арипов, Ўзбекистон Республикаси Президенти Администрацияси департаменти раҳбари Одил Абдурахманов, Спорт вазири Адҳам Икрамов, Осиё Олимпия кенгаши (ООК) вице-президенти Отабек Умаров, Бош Ассамблея аъзолари, шунингдек, федерация ва ассоциацияларнинг масъуллари иштирок этишди. Унда Ўзбекистон Миллий Олимпия қўмитаси раҳбариятининг таркиби қайта шакллантириб олинди.

Тадбирни МОҚ Бош котиби Ойбек Касимов олиб борди ва МОҚ низомига асосан ҳар бир Олимпия циклида Ўзбекистон Миллий Олимпия қўмитасининг раҳбарияти таркиби қайта шакллантириб олиниши ҳақида алоҳида тўхталиб ўтди. Қайд этиш жоиз, Президентимиз 2022 йил 23 май куни Спорт вазири Адҳам Икрамовга Ўзбекистон Миллий Олимпия қўмитаси фаолиятини мувофиқлаштириш бўйича топшириқ берган эдилар. Шу боис, Адҳам Илҳамович Бош Ассамблея аввалида ортда қолган Олимпия циклида амалга оширилган ишлар юзасидан ҳисобот берди.

Тадбирда сўз олган Бош вазир қўлга киритилган ютуқлар ҳақида тўхталар экан, тўлиқ фойдаланилмаган имкониятлар, кутилган натижани қайд этмаган федерациялар хусусида танқидий фикр билдирди.

Шундан сўнг кун тартибидаги бошқа масалалар кўриб чиқилди. Даставвал, Ўзбекистон Миллий Олимпия қўмитасига янги раҳбар сайланди. Абдулла Нигматович ушбу лавозим учун номзод ҳақида тўхталар экан, Лос-Анжелес-2028 ёзги Олимпия ўйинларига ҳар томонлама пухта тайёргарлик кўриш лозимлиги, мамлакатимизнинг кўп минг сонли олимпия оиласи, спортчи ва мураббийларнинг илтимосини инобатга олган ҳолда Ўзбекистон Республикаси Президенти Мирзиёев Шавкат Миромонович номзодини илгари сурди. Номзод барча делегатлар томонидан бир овоздан маъқулланди ва Ш.М.Мирзиёев Ўзбекистон Миллий Олимпия қўмитасининг раиси этиб сайланди.

Шунингдек, Қўмита раисининг ўринбосарлари таркиби ҳам шакллантириб олинди. Унга мувофиқ, Осиё Олимпия кенгаши вице-президенти Отабек Умаров МОҚ раисининг биринчи ўринбосари, Ойбек Касимов Бош котиб ва Шерзод Ташматов раис ўринбосари лавозимига сайланишди. Тадбир давомида Қўмитанинг янгиланган устави ҳам тасдиқлаб одинди. Шунинг билан, МОҚнинг 41-Бош Ассамблеяси ўз ишини якунлади.