Шавкат Раҳмонов жамоасида унинг кейинги фаолияти билан боғлиқ вазиятга ойдинлик киритилди

Раҳмонов шу йил бошида тиззасида ўтказилган навбатдаги операциядан сўнг машғулотлар жараёнини қайта бошлаган бўлса-да, "Номад" мухлислари унинг яқин олти ой ичида октагонга қайтишига умид қилмаслиги керак.

Айни пайтдаярим ўрта вазн тоифаси вакили реабилитация курсидан ўтмоқда ва унинг фаолиятини якунлаши эҳтимоли ҳали ҳамон сақланиб қолмоқда. Бу ҳақда унинг менежери Саят Абдураҳмонов "Матч ТВ"га берган интервьюсида маълум қилди.

"Айни пайтда фаолиятни якунлаш муҳокама қилинмаяпти, аммо бундай хатар ҳар доим бор. Бу ўта жароҳатли спорт тури бўлиб, катта ресурсларни талаб қилади. Ҳозир қайтишга шошилишдан маъно йўқ. Реабилитациядан тўғри ўтиш, тикланиш керак. Кейин режалаштириш керак. Ҳозирча унинг бу йил яна чиқиш қилиши учун вариантларни кўрмаяпман. Келгуси йил бу ҳақиқатга яқинроқ бўлади", - деди Абдураҳмонов.

31 ёшли Шавкат Раҳмонов охирги марта октагонга 2024 йил декабрь ойида чиққан. Ўшанда у даъвогарлик жангида Йен Мачадо Гэррини ҳакамларнинг якдил қарори билан мағлуб этганди. Аммо айнан ирландиялик билан тўқнашувда тиззасидан олган жароҳати туфайли чемпионлик имкониятидан фойдалана олмаган эди.

Жорий йилнинг февраль ойида узоқ вақт давомида фаол бўлмаганлиги сабабли, ярим ўрта вазн тоифасида иккинчи ўринни эгаллаб турган Шавкат дивизион рейтингидан чиқарилганди.