Шахмат. Ўзбекистон чемпионати олий лигасида финалчилар аниқланди

Эркаклар ўртасидаги баҳсларда таниқли гроссмейстеримиз Шамсиддин Воҳидовни мусобақадан чиқариб юборган истеъдодли шахматчимиз Муҳаммадзоҳид Суяров финал остонасида тўхтатилди. У 1/2 финалда икки ўйин натижасига кўра гроссмейстер Ортиқ Ниғматовга 0,5:1,5 ҳисобида имкониятни бой бериб қўйди. 

Иккинчи ярим финал учрашувида гроссмейстерларимиз Нодирбек Якуббоев ва Муҳиддин Мадаминов ўзаро тўқнаш келишди. Ушбу қарама-қаршиликда Якуббоев 1,5:0,5 ҳисобида ғалаба қозониб, финалга йўл олди.

Аёллар ўртасидаги мамлакат чемпионатининг 1/2 финалида тажрибали Нодира Нодиржонова рейтингда ўзидан анча юқорида турган, ёшлар ўртасида икки карра жаҳон чемпиони Афруза Ҳамдамовадан 1,5:0,5 ҳисобида устун келди. 

Нодиржонованинг финалдаги рақибаси Умида Омонова бўлади. У 1/2 финалда Маржона Маликовани 3:1 ҳисобида доғда қолдирди. Шахматчилар биттадан ғалабага эришишди. Тай-брекнинг ҳар икки партиясида эса Омонова зафар қучди. Финал ва 3-ўрин соҳибини аниқлаб берувчи ўйинлар эртага, 26 апрель куни соат 14:00да бошланади.