Шахматчи қизларимиз Singapore International Open турнирида дона суришяпти

А ва В гуруҳларида ташкил этилаётган мусобақада дунёнинг 40 га яқин давлатлари қатори ўзбекистонлик шахматчи қизлар ҳам ўз имкониятларини синовдан ўтказишяпти. Улар орасида истеъодли шахматчимиз Гулдона Каримова (2115) етакчилар сафида бормоқда. 

Кучлилар жам бўлган А гуруҳи баҳсларида қатнашаётган Гулдона 3 имкониятдан 2,5 очко жамғариб, қўшимча кўрсаткичларга кўра 11-ўринни эгаллаб турибди. Иккинчи ўриндаги ҳиндистонлик Сетураман ҳисобида ҳам 2,5 очко бор. Кеча Гулдона 3-турда италиялик гроссмейстер Алессио Валсекки (2478)ни мағлуб этишни уддалади. 

Афсуски, Бутунжаҳон шахмат Олимпиадасида шов-шув кўтарган қизларимизнинг ҳозирча Сингапур турнирида омади келмаяпти. Тажрибали Нодира Нодиржонова (2137) оқ доналарда филиппинлик Эммануэль Гарсия (2397)га, Умида Омонова қора доналарда ҳиндистонлик Ра Ҳарикришнан (2473)га имкониятни бой бериб қўйди. 

Узоқ муддатдан кейин катта шахматга қайтган Нодиржонова Бутунжаҳон шахмат Олимпиадасида муваффақиятли тарзда қатнашиб, ўз доскасида кумуш медални қўлга киритганди. 

Учинчи турда шахматчи қизларимиздан Барчиной Шокиржонова ва Асал Салимова рақиблари билан дуранг ўйнашди. Маржона Маликова вьетнамлик Мин Нгуендан, Нилуфархон Имомқўзиева англиялик Сидхарт Гопакумардан устун келди. Бугун Гулдона Каримова 4-турда қора доналарда ўзи сингари 2,5 очкога эга россиялик Михаил Кобалияга қарши баҳс олиб боради.