Шахматчиларимиз иштирокидаги "Qonaev Cup 2025" турнирида 2-тур партиялари ўйналди

Учта гуруҳда ташкил этилаётган мусобақада 19 давлатдан жами 268 нафар шахматчи совринли ўринлар учун баҳс олиб бормоқда. Ушбу турнирда Ўзбекистон шарафини 5 нафар шахматчимиз ҳимоя қиляпти. 

Мукофот жамғармаси 78 000 долларни ташкил этувчи "Masters" гуруҳида Муҳаммадзоҳид Суяров (2488) ва Ҳумоюн Бегмуратов (2466), 15 000 доллар соврин пулига эга "Challengers" гуруҳида эса гроссмейстеримиз Алексей Барсов (2323), шунингдек Миразиз Матякубов (2260) ҳамда Азамат Дауримбетов (2199) ўз омадини синаб кўрмоқда.

Иккинчи турда Муҳаммадзоҳид Суяров оқ доналарда ўйнаганига қарамай қозоғистонлик Аяулим Калдарова (2220)ни мағлуб эта олмади. Учрашув дуранг натижа билан якунига етди. Суяров 1-турда ҳам рақиб билан муросага келганди. Ҳумоюн Бегмуратов эса оқ доналарда мезбонлар вакили Ергали Сулейман (2408)га имкониятни бой бериб қўйди. Муҳаммадзоҳид 1 очко билан қўшимча кўрсаткичларга кўра 42, Ҳумоюн эса 0,5 очко билан 54-ўринни банд этган. 

"Challengers" гуруҳида қатнашаётган уч нафар вакилимизнинг бари 1-турда ғалабага эришганди. Иккинчи турда эса кутилмаганда тажрибали гроссмейстеримиз Алексей Барсов қозоғистонлик Исабек Таникин (2110)га ютқазиб қўйди. Миразиз Матякубов ва Азамат Дауримбетов кетма-кет иккинчи ғалабаларини тантана қилишди. Улар мос равишда қозоғистонлик шахматчилар Ризат Улан ҳамда Шингис Борандан устун келди. Матякубов ва Дауримбетов 100 фоизлик натижа билан пешқадамлар сафида бормоқда.