Шахматчиларимиз Жаҳон чемпионатидаги иштирокларини бошлашди

Чемпионат стандарт йўналишида 11 турдан иборат бўлиб, иштирокчиларга 90 дақиқа ва биринчи юришдан бошлаб, 30 сониядан вақт назорати белгиланади. Ушбу дунё биринчилигида Ўзбекистон терма жамоасининг 11 нафар шахматчиси ҳам баҳсларга киришди.

Ўғил болалар ўртасидаги 1-турда гроссмейстеримиз Муҳиддин Мадаминов оқ доналарда ўйнашига қарамай, рейтингда ўзидан анча қуйида бораётган ҳиндистонлик Ведант Нагаркатт билан муросага келди. Муҳаммадзоҳид Суяров қора доналарда ҳаракат қилиб, испаниялик Роберто Флоринни мағлубиятга учратди. Илк турда Асроржон Омонов ва Миразиз Матёқубов ҳам ғалабага эришди.  

Қизлар ўртасидаги 1-турда ёшлар ўртасида икки карра жаҳон чемпиони Афруза Ҳамдамова қора доналарда ўйнаб, сербиялик Ирина Вуятовичдан устун келди. Гулдона Каримова черногориялик Матея Попович, Умида Омонова молдовалик Ана Петрисенкони енгди.  

Маълумот учун, ушбу жаҳон чемпионатида 1-ўринни эгаллаганлар гроссмейстерлик унвонига эга бўлади.