Шерзод Ташматов Сурхондарё вилоятидаги спорт даргоҳларининг фаолиятини ўрганди + ФОТО

Бу сафар МОҚ раиси ўринбосари Шерзод Ташматов ҳамда Жисмоний тарбия ва спорт бўйича мутахассисларни қайта тайёрлаш ва малака ошириш институти раҳбари Илҳомжон Турсуналиевдан иборат ишчи гуруҳ Термиз шаҳрида бўлди.

Термиз Олимпия захиралари коллежида ўтган учрашувда вилоятдаги соҳа мутахассислари билан долзарб масалалар юзасидан фикр алмашилди. Очиқ мулоқот тарзида ўтган суҳбат давомида соҳадаги муаммолар ўртага ташланиб, уларнинг ечими, келиб чиқиш сабаблари чуқур ўрганилди. Ҳар бир вилоятда бўлгани каби иқтидорли ёшларни селекция қилиш бўйича таэквондо ва дзюдо спорти мисолида ишлаб чиқилган янги тизим тақдимоти ўтказилди. 

Қайд этиш жоиз, йиғилишда қатнашган таниқли дзюдочи, Токио-2020 иштирокчиси ва ЖЧ совриндори, ҳозирда мураббийлик фаолияти билан шуғулланаётган Шарофиддин Лутфуллаев мазкур лойиҳани қўллаб-қувватлади.

Ташриф давомида мутасаддилар вилоят спортни ривожлантириш бошқармаси ва дзюдо федерацияси мутасаддиларининг ҳамроҳлигида бир қатор спорт мактаблари, хусусан, Термиз ОЗК фаолияти билан яқиндан танишишди. Шерзод Ташматов масканлардаги ошхоналар фаолиятига ҳам аҳамият қаратди. Ёш спортчилар учун тайёрланаётган овқатлар рациони, ҳафталик менюлар билан яқиндан танишиб, унинг таркибини янада фаол озуқавий моддалар билан бойитиш бўйича қўшимча тавсиялар берди.

Ишчи гуруҳ сафар доирасида Термиздаги спорт масканлари ва коллеж фаолиятини ўрганибгина қолмай, Бойсун туманида ҳам бўлдилар. У ердаги спорт мактабларининг фаолияти билан яқиндан танишиб, самарадорликни янада ошириш бўйича керакли тавсиялар берилди.

Президент қарорига кўра, эндиликда Олимпия захиралари коллежлари негизида Олимпия ва Паралимпия спорт турларига тайёрлаш марказлари фаолият олиб боради. Ташриф якуни бўйича Шерзод Ташматов ва Илҳомжон Турсуналиев спорт турлари имкониятидан келиб чиққан ҳолда таълим муассасаларининг фаолияти, айниқса, коллеж қабули учун квоталарни қайта кўриб чиқиш бўйича ўзлари учун зарур маълумотларни белгилаб олишди.