Шоҳжаҳон Эргашев иштирокидаги жанг олдидан Ташкилий қўмита йиғилиш ўтказди

Унда Ўзбекистон Республикаси Туризм ва спорт вазирлиги, Миллий Олимпия қўмитаси, Ўзбекистон профессионал бокс федерацияси мутасадди ва мутахассислари, шунингдек Соғлиқни сақлаш, Ички Ишлар вазирликлари, Миллий Гвардия масъуллари ва бошқа алоқадор ташкилот ходимлари иштирок этишди.

Йиғилишни олиб борган Ўзбекистон Миллий Олимпия қўмитаси раисининг ўринбосари Шерзод Тошматов мамлакатимизда халқаро аҳамиятга молик спорт тадбирларини ўтказиш анъана тусини олаётганлиги, ҳар бир нуфузли турнирни ўзига хос тарзда ташкиллаштириш катта аҳамият касб этишини таъкидлаб, мусобақанинг телевизион ташвиқоти, уни жаҳон теле каналларига узатиш орқали Ўзбекистоннинг халқаро обрў-эътиборини ошириш муҳим эканлигини айтиб ўтди. Йиғилишда иштирок этган “SPORT” ТВ телеканали директори Зохид Каримов бу борада барча ишлар ҳал этилганлигини айтиб, мазкур мусобақа айнан телевизион лойиҳа асосида ўтказилаётганлигига барчанинг эътиборини қаратди.

Тадбир давомида шунингдек, Соғлиқни сақлаш вазирлиги, Миллий Гвардия, Тошкент шаҳар Ички ишлар бош бошқармаси масъуллари ҳам ўз вазифаларига доир масалалар хусусида сўз юритишди.

Йиғилиш давомида ҳар бир ташкилотнинг масъуллари “Профессионал бокс кечаси”ни ўтказиш билан боғлиқ масалалар бўйича ўз фикрларини билдиришди ва белгиланган вазифаларнинг ижроси бўйича ахборот беришди.

Ўзбекистон профессионал бокс федерацияси Матбуот хизмати