Шоҳжаҳон Эргашев навбатдаги жангини қачон ва қаерда ўтказишини айтди

"Асосий эътиборимни ўз промоутерлигим томонидан ўтказилаётган бокс кечаларига қаратганман. Фарғона, Самарқанд ва Наманганда бу бокс турнирларини муваффақиятли тарзда ўтказиб олдик. Навбатдаги мусобақани сентябрь ойида Жиззах ёки Бухорода ўтказишни режалаштиряпмиз. Бу турнирларда ўзларини ёрқин намойиш эта олган 3-4 нафар боксчини аниқлаб олдик ва энди уларга хориждаги турнирларда жанг ташкил қилиб берамиз. Бугун ўзимга ҳам жанг ўтказиш таклифи берилди. Октябрь ойида Британиядаги турнирда жанг ўтказаман. Тез орада машғулотлар учун Россия ёки АҚШга жўнаб кетаман", - деди Эргашев.    

Шоҳжаҳон Эргашев айтган октябрь ойида boxrec сайтига расман жойланган бир нечта турнирлар бор: 3 октябрь Бирмингем, 4 октябрь Саутгэмптон, Манчестер, Глазго, Шеффилд, 10 октябрь Лидс, 11 октябрь Бристол, Фарнворт, Престон, Битнал Грин, Вуд Грин, Шеффильд, 12 октябрь Лирхук, 17 октябрь Битнал Грин, 18 октябрь Лидс, 30 ва 31 октябрь кунлари Глазго. 

Маълумот учун, 33 ёшли чарм қўлқоп устамиз ҳозиргача 27 та жангда 25 ғалаба ва 2 та мағлубият қайд этган.