Шукуржон Аминова ЖЧ бронза медали учун баҳсда икки карра Олимпиада чемпионига қарши татамига чиқди + ФОТО

Бироз аввал ҳамюртимиз Шукуржон Аминова жаҳон чемпионатининг бронза медали учун франциялик Сара-Леони Сизикка қарши татамига чиқди. Асосий тўрт дақиқаликда ғолиб аниқланмади. Қўшимча дақиқалардаги битта усул тажрибали, номдор Сизикка бронза медалини тақдим этди. 

Таъкидлаш жоиз, Сара-Леони Токио-2020 Олимпиадаси яккалигида кумуш, аралаш жамоавий баҳсларида олтин, Париж-2024 Олимпия ўйинларинин яккалигида бронза, аралаш жамоавий беллашувларида яна олтин медални қўлга киритган. Жаҳон чемпионатларининг уч карра совриндори ҳисобланади. Европа чемпионатида 1 та кумуш, 3 та бронза медалига эга чиққан. 

Йигирма олти ёшида шунча ютуққа эришган француз дзюдочисига қарши 22 ёшли Шукуржон Аминова муносиб қаршилик кўрсатди. Шундан келиб чиқиб айтиш мумкин-ки, Шукуржон учун бу жаҳон чемпионати ижобий якунланди. У жаҳон рейтинги учун қимматли 720 очкони қўшиб қўйди. Айни пайтда 14-ўринни эгаллаб турган вакиламиз янгиланган рейтингда Топ-10`га кириб олиши мумкин.