Шумахер Ф-1даги илк ғалабасини қўлга киритган болид 8,5 млн еврога сотувга қўйилади + ФОТО

Бу 1992 йилги мавсумдаги Benetton-Ford жамоасининг 05 рақамли шассиси бўлиб, унда Михаэль Шумахер фаолиятидаги биринчи ғалабасини қўлга киритган. Болиднинг тахминий нархи 8,5 миллион евродан ошади.

Айнан шу болидда етти карра жаҳон чемпиони Михаэль Шумахер 1992 йилда "Спа-Франкоршам" трассасида Бельгия Гран-присида ғолиб чиққан. Ҳаммаси бўлиб, немис бу машинада 1992 йилги мавсумнинг бешта босқичида қатнашган ва Канада Гран-присида иккинчи ўринни эгаллаган.

"Мен буни чиндан ҳам тасвирлаб беролмайман. Бутун ҳафта давомида ўзимни анча яхши ҳис қилдим ва бугун мотор залида бўлганимда, бу пойгада ғалаба қозонишим мумкинлигини ўйладим. Мен жамоага миннатдорлик билдиришим керак... бу ғалабани немис мухлисларига бағишлашим лозим", - дея Шумахернинг ўша ғалабадан кейинги сўзларини келтиради аукцион уйи сайти.

Бенеттон спортдан кетганидан сўнг, машина Renault Classic коллекциясида сақланган.