Шумков Тошкентда Халоковга реванш беришга тайёр

Ушбу жангда Шумков боксчимизнинг қулоғидан тишлаб олган ва бу ҳолат жаҳон бокс ҳамжамиятининг кескин норозилигига сабаб бўлганди. Натижада Ўзбекистон терма жамоаси вазият юзасидан шикоят киритган, аммо IBA, яъни Халқаро бокс ассоциацияси жанг натижасини ўз кучида қолдирганди.

Россия бокс федерацияси мураббийлар кенгаши раиси Эдуард Кравцовнинг сўзларига кўра, IBA.PRO турнирларидан бирида ташкилот боксчилар ўртасида реванш жангини ўтказишга тайёр.

"Фикримча, объектив қарор қабул қилинди, - деди Кравцов "Матч ТВ"га берган интервьюсида. - Биламан, IBA раҳбари Умар Кремлёв реванш уюштиришга ва ҳар икки боксчига IBA.PRO шоуси форматида кучлиларни аниқлаш имкониятини беришга тайёр. Ҳамма савол шундаки, агар Ўзбекистон томони Халоков ушбу вазн тоифасида ҳақиқатан ҳам энг кучли эканлигини исботлаш учун реванш олишни истаса, бунга рози бўладими?

"Шунингдек, Всеволод Шумков билан ҳам суҳбатлашдим. Ва у ҳар қандай вақтда ва ҳар қандай жойда реванш беришга тайёр. Қолаверса, Шумков Тошкентда реванш жанги ўтказилишига ҳам тайёр эканини айтди", - дея қўшимча қилди Кравцов.