Сирдарёда «Спортни сев, спорт билан яша!» шиори остидаги спорт мусобақалари қандай ташкил этилмоқда?

Сирдарё вилоятида Ўзбекистон Республикаси Президентининг 2020 йил 30 октябрдаги «Соғлом турмуш тарзини кенг татбиқ этиш ва оммавий спортни янада ривожлантириш чора-тадбирлари тўғрисида»ги Фармони ижросини таъминлаш мақсадида Жисмоний тарбия ва спорт вазирлиги ҳамда Миллий олимпия қўмитаси ташаббуси билан «Спортни сев, спорт билан яша!» шиори остидаги оммавий спорт мусобақалари юқори савияда ташкил этилмоқда. 

Жорий йил 24 январь куни вилоятнинг Мирзаобод тумани «Наврўз» маҳалласида жойлашган болалар-ўсмирлар спорт мактабида саралаш босқичида ғолиб бўлган «Янги ҳаёт», «Ойдин», «Боғистон» ва «Баҳористон» маҳалласи ёшлари ўртасида мини-футбол мусобақасининг туман миқёсида финал босқичи бўлиб ўтди. Унда «Боғистон» маҳалласи ёшлари ғолиб бўлишди ва вилоят босқичига йўлланмани қўлга киритди.

Шунингдек, Мирзаобод туманидаги 34-сонли умумтаълим мактабида таэквондо ИТФ спорт тури бўйича «Спортни сев, спорт билан яша!» шиори остида туман очиқ биринчилиги ўтказилди. Мусобақада вилоятнинг Мирзаобод, Боёвут, Сайхунобод туманлари ҳамда Гулистон шаҳар БЎСМ жамоалари қатнашди. 

Мусобақада жами 80 нафар спортчи (шундан 12 нафари қизлар) ғолиблик учун кураш олиб боришди. Ғолиб ва совриндорлар ҳамкор ташкилотлар, жумладан Мирзаобод туман электр тармоғи ҳамда Мирзаобод туман БЎСМ томонидан медаль, диплом ҳамда эсдалик совғалари билан тақдирландилар.