Собир Раҳимов: "Карантинни мазмунли ўтказишга ҳаракат қиляпмиз"

Аввал хабар берганимиздек, Ўзбекистон спорт курашлари ассоциацияси мутасаддилари, мураббийлар, ходимлар ўз вазифаларини масофадан олиб боришяпти. 

Хусусан, Ассоциациямизнинг Бухоро вилояти бўлимида ҳам ишлар режа асосида олиб бориляпти. Суҳбатдошимиз эркин кураш бўйича вилоят терма жамоаси мураббийи Собир Раҳимовдан айни мавзу бўйича қисқача интервью олдик. 

- Собир ака, бугунги синовли кунларни қандай ўтказяпсизлар? 

- Ўзбекистон спорт курашлари ассоциациясидан вилоятлардаги бўлимларга режавий дастур тақдим этилган. Ишларни шу асосида олиб боряпмиз. Энди бу элга келган тўй. Насиб қилса, тез кунларда бу балодан қутуламиз. 

- Вилоятдан терма жамоаларга номзод курашчилар билан боғланиб турибсизларми?

- Албатта. Ҳар куни онлайн тарзда видео машғулот ўтказамиз. Терма жамоага номзод курашчиларимизнинг бош мураббий томонидан берилган алоҳида дастурлари ҳам бор. Шу асосда машғулот ўтказишяпти. Тўғри, карантин даврида тўлақонли машғулот ўтказишнинг имкони йўқ. Лекин бор имкониятдан максимал даражада фойдаланяпмиз.         

- Собир ака, очиғи иш билан бўлиб фарзандларимиз билан ҳам камроқ суҳбатлашардик. Карантин кунлари эса ҳар куни оиламиз даврасидамиз...

- Ҳа, нимасини айтасиз. Мусобақалар, ўқув-машғулот йиғинлари сабаб уйда кам вақт бўлардик. Ҳозир фарзандлар билан бирга дарс тайёрлаяпмиз. Ҳовлимизда кичик иссиқхонамиз бор. У ерда жисмоний меҳнат билан шуғулланяпмиз. Зерикишга ҳожат йўқ.  

Маълумот учун, Собир аканинг шогирдлари орасидан Мирзо Ҳайитов, Феруз Ёқубов, Соҳиб Искандеров сингари курашчиларни алоҳида таъкидлаб ўтиш ўринли бўлади.