Соболенко бир мавсум учун мукофот пуллари бўйича Уильямснинг рекордини янгилади

Беларуслик теннис маликаси ўтган ҳафта Ар-Риёдда ўтказилган Якуний WTA турнири финалида қозоғистонлик Елена Рибакинага ютқазиб (3/6, 6/7(0) қўйган бўлса-да, бир мавсум учун рекорд даражада мукофот пулига эга чиқди. 

Арина Соболенко 2025 йилги теннис мавсумида 15 008 519 доллар ишлаб топди. Бу билан у Серена Уильямсга тегишли рекордни янгилади. Серена 2013 йилги мавсумда $ 12 385 572 мукофот пули ишлаган эди. Ўша йили Уильямс "Катта Дубулға" туркумига кирувчи "Ролан Гаррос" ва US Open, шунингдек, Якуний WTA турнирида чемпион бўлганди.

Маълумот учун, якунига етиб бораётган 2025 йилда Арина Соболенко US Open, Мадрид ва Майамидаги WTA 1000 ҳамда Брисбен WTA 500 турнирларида бош совринни қўлга киритди. У яккалик баҳсларида ўтказган 75 та учрашувдан 63 тасида ғалаба қозонди.