Спорт чекинмоқда. WBC, IBF ва WBО россияликлар иштирокидаги жангларга санкция беришдан бош тортди

Тўртта энг яхши бокс ташкилотидан учтаси - WBC, IBF ва WBО - Россиянинг Украинага қарши ҳарбий тажовузи тўхтамагунча россияликлар иштирокидаги жангларга санкция беришдан бош тортди.

WBА, кутилганидек, четда қолди - улар россиялик Дмитрий Бивол ва мексикалик Сауль Канело Альварес ўртасидаги молиявий жиҳатдан фойдали жангга қизиқишни йўқотишдан қўрқишмоқда. Ҳеч нарса ўзгармаса, бу жанг 7 май куни бўлиб ўтади.

Қўшма қарор WBC томонидан эълон қилинди: “Биз бутун спорт оламини зудлик билан қарши чиқишни ва Россиянинг Украина ҳудудига бостириб киришини тўхтатишга чақирамиз. Бугундан бошлаб бизнинг ташкилотлар руслар ва беларуслар иштирокидаги жангларга санкция қўймайди. Биз вазиятни доимий равишда кузатиб борамиз. Умид қиламизки, ҳамма нарса тез орада ҳал бўлади, яқин орада Украина ҳудудида нормал ҳаёт ва инсон фаолияти тикланади.

“Бокс олами тинчлик учун бирлашди. Спорт олами урушнинг ҳар қандай кўринишларига қарши туриш учун бирлашди. Бегуноҳ одамлар ўлмоқда, Украина ва Россиядан келган аскарлар ҳалок бўлмоқда", -  деб ёзади WBC.