Спорт курашлари. Ўсмирларимиздан Олимпия ўйинларига лицензия!

Бугун аёллар кураши ва эркин кураш бўйича беллашувлар бўлиб ўтди. Аввалроқ аёллар кураши бўйича икки нафар спортчимиз Шоҳида Аҳмедова ва Светлана Оқназаровалар финал йўлланмасини ҳал қилиб, ўсмирлар Олимпия ўйинларига йўлланма соҳибасига айланганликлари ҳақида хабар қилгандик.

Бироз аввал қизларимиз мусобақанинг финал жангида курашга чиқдилар. Афсуски, уларнинг ҳар иккиси ҳам ҳал қилувчи беллашувда имкониятни бой бериб қўйдилар ва Осиё чемпионатининг кумуш медаллари билан кифояланишди. Аммо, хабар бериб ўтганимиздек, финалга чиқиш орқали улар октябрь ойида Буэнос-Айресда бўлиб ўтадиган ўсмирлар Олимпия ўйинларига йўлланмани нақд қилиб қўйгандилар.

Эркин курашнинг -80кг вазн тоифасида юртимиз шарафини ҳимоя қилган Муҳаммадрасул Раҳимовга финалда бироз омад етишмади. Ҳамюртимиз бутун жанг давомида устунлик қилди. Афсуски, 4:0 ҳисобида олдинда бораётган спортчимиз сўнгги сонияларда ташаббусни рақибга бой бериб қўйди ва 4:5 ҳисобида мағлубиятга учради. Шу тариқа Муҳаммадрасул Осиё чемпионатининг кумуш медалини қўлга киритди ҳамда Олимпия ўйинлари лицензиясидан қуруқ қолди.

-71кг вазнда мусобақада иштирок этган Азизбек Файзуллаев эса бронза медали учун баҳсда япониялик рақиби устидан ғалаба қозониб, мусобақа совриндорлари қаторидан ўрин олди.

Эртага мусобақанинг сўнгги куни бўлиб ўтади ва унда эркин кураш бўйича беллашувлар ташкил қилинади.