01 фев 08:14
Янгиликлар

Тадбирлар

Спорт вазирлиги ва МОҚ раҳбарияти Жиззах ҳамда Сирдарё вилоятларининг 2025 йил режалари билан танишди

Спорт вазири Адҳам Икрамов ва МОҚ Бош котиби Ойбек Касимов айни пайтда Жиззах ва Сирдарё вилоятларида хизмат сафарида бўлиб туришибди.

Ташрифдан ушбу вилоятлардаги спорт инфратузилмасининг бугунги ҳолатини ўрганиш, 2025 йил учун режалар билан танишиш кўзланган.

Мутасаддилар вилоят ҳокимлари билан Олимпия ва Паралимпия спорт турларига тайёрлаш марказлари, шунингдек, бошқа спорт таълим муассасаларини кўздан кечириб, у ердаги шароитлар билан яқиндан танишишди. Сафар давомида вилоят спорт бошқармаси мутасаддилари, федерацияларнинг ҳудудий вакиллари билан учрашув ўтказилди.

Унда вилоятда олимпия ва паралимпия ҳаракатини ривожлантириш, йўлга қўйилиши кутилаётган “Дивизион спорт мусобақалари”га пухта тайёргарлик кўриш, спорт соҳасини рақамлаштириш, инфратузилмани янада яхшилаш каби масалалар кўриб чиқилди.