Стэн Вавринка: "Фаолиятимнинг якуни кўринмоқда"

Шу ҳафта рейтингига кўра, швейцариялик теннисчи 45-ўринни эгаллаб турибди.

"Фаолиятимнинг якуни кўринмоқда, бироқ ўзимни қаридек ҳис қилмаяпман. Турнирлар давомида мени бутун дунёдан қўллаб туришибди. Бунинг асосий сабаби - теннис ўйнашда давом этяпман. Умид қиламанки, яна шундай давом этаман. Бироқ яна қанча вақт ўйнашимни билмайман.

"Катта Дубулға" ва "Мастерс"лардаги ғалабаларим сабабли 4 ажойиб йилни ўтказдим. "Дубулға" финалида уч марта дунёнинг биринчи ракеткасини мағлуб этдим. Бу фаолиятимнинг энг ажойиб онлари бўлди.

Шунингдек, Олимпиада-2008да Рожер Федерер билан жуфтликда олтин медални ҳам қўлга киритганим фаолиятимдаги энг зўр пайтларга тўғри келди. Делегациям билан олимпия шаҳарчасида бўлиш, у ердаги олтин медаль эса катта тажриба берди. Бу бутун бир ҳаётим давомида ёдда қолади.

Ёшлигимда бу ҳақида орзу ҳам қилмаганман. Мақсадим - профессионал теннисчига айланиш ва кучли юзталикка кириш эди. Шундан кейин Топ-50, Топ-20, Топ-10 ҳақида ўйлашни бошлаганман", - деди Вавринка.