Superbet Chess Classic Romania. Нодирбек Абдусатторов очко жамғаришда давом этмоқда

Grand Chess Tour 2025 таснифига кирувчи — Superbet Chess Classic Romania турнирининг мукофот жамғармаси 350 000 АҚШ долларини ташкил қилади. Ғолиб умумий сумманинг 100 000 долларига эга бўлади. Дунёнинг кўзга кўринган гроссмейстерлари қаторида бош соврин учун Нодирбек Абдусатторов ҳам кураш олиб бормоқда. 

Гроссмейстеримиз кеча ўтказилган 8-тур учрашувида турнир жадвалида иккинчи ўринни эгаллаб турган франциялик Алиреза Фирузджага қарши қора доналарда ўйнади ва дурангга имзо чекди. Нодирбек 7-турда мусобақадаги биринчи ғалабасини қўлга киритганди. У оқ доналарда польшалик халқаро гроссмейстер Ян-Криштоф Дудани мағлубиятга учратган эди. 

Нодирбек сўнгги 9-тур олдидан 1 ғалаба, 6 дуранг ва 1 мағлубият билан 4 очко жамғарган ҳолда қўшимча кўрсаткичларга кўра 7-поғонадан 5-ўринга кўтарилиб олди. Америкалик Уэсли Содан устун келган ҳиндистонлик Рамешбабу Праггнанандҳа 5 очко билан якка пешқадамга айланиб олди. Ниҳоят, амалдаги жаҳон чемпиони Гукеш Доммараджу ҳам мусобақадаги биринчи ғалабасини қўлга киритди. У қора доналарда ўйнаганига қарамай, америкалик Левон Аронянни таслим эта олди.   

Бугун мусобақанинг сўнгги 9-тур учрашувлари ўтказилади. Нодирбек Абдусатторов оқ доналарда турнир жадвалида 3,5 очко билан қўшимча кўрсаткичларга кўра 8-ўринни эгаллаб турган америкалик гроссмейстер Уэсли Сога қарши баҳс олиб боради. Агар ҳамюртимиз бугун ғалаба қозона олса, катта эҳтимол билан мусобақани кучли учликда якунлайди.