Superbet Poland Rapid & Blitz. Нодирбек Абдусатторов Магнус Карселнни мағлуб этди (Жадвал + ФОТО)

Мукофот жамғармаси 175 000 АҚШ долларини ташкил этувчи ушбу мусобақада дунёнинг кучли 10 нафар гроссмейстери бош соврин учун баҳсларга киришганди. Икки кун давом этган рапид турнирида хитойлик Вэй И 13 очко билан ғолибликни қўлга киритганди. Ўнта турда мағлубиятга учрамаган Магнус Карлсен 12 очко билан иккинчи ўринни эгаллаганди. 

Дунё рейтингида 5-ўринни эгаллаб турган ҳамюртимиз Нодирбек Абдусатторов эса 8 очко жамғариб, ҳиндистонлик Эригайси билан 6-7 ўринларни бўлишиб олган эди. Кеча эса турнирда блиц баҳслари старт олди. Блицнинг биринчи куни гроссмейстерлар 9 та турда дона суришди. 

Эътиборлиси, Нодирбек блицнинг 3-турида қора доналарда ўйнашига қарамай, жаҳон чемпиони Магнус Карлсенни мағлуб этишга муваффақ бўлди. Абдусатторов Карлсенга иккита мағлубиятидан бирини тақдим этди. Ҳамюртимиз 9 та турда 3 та ғалаба, 3 та дуранг ва 3 мағлубият қайд этди. У 4,5 очко билан қўшимча кўрсаткичларга кўра 4-ўринни эгаллаб турибди. 

Хитойлик Вэй И блицда ҳам маҳорат кўрсатмоқда. У 7,5 очко билан якка пешқадам бўлиб олган. Кучли учликдан жой олган Магнус Карлсен ва Аржун Эригаиси ҳисобида 6 тадан очко бор. Бугун блиц турнири давом эттирилади. Блицда ҳар бир ғалабага 1, дурангга эса 0,5 очко тақдим этилади. Турнир ғолиби 40 000 долларга эга бўлади.   

Иштирокчилар: Магнус Карлсен (Норвегия, рапид 2828/блиц 2886), Вэй И (Хитой, 2758/2684), Ян-Кшиштоф Дуда (Польша, 2748/2766), Нодирбек Абдусатторов (Ўзбекистон, 2733/2661), Рамешбабу Прагнанандҳа (Ҳиндистон, 2704/2675), Аниш Гири (Нидерландия, 2687/2715), Аржун Эригайси (Ҳиндистон, 2671/2744), Доммараджу Гукеш (Ҳиндистон, 2649/2651), Винсент Каймер (Германия, 2647/2610), Кирилл Шевченко (Руминия, 2622/2546).

Рапид ва блиц йўналишларининг умумий жадвали