Superunited Rapid & Blitz Croatia. Абдусатторов блиц баҳсларининг биринчи кунини яхши ўтказди

Мукофот жамғармаси 175 000 АҚШ долларини ташкил этувчи мусобақа рапид ва блиц йўналишларида ўтказиляпти. Унда Магнус Карлсен, Гукеш Доммараджу, Фабиано Каруана сингари шахмат юлдузлари қаторида ҳамюртимиз Нодирбек Абдусатторов ҳам совринли ўринлар учун дона сурмоқда.    

Мусобақанинг тўртинчи куни шахматчилар блиц баҳсларининг 9 та турида ўзаро ҳисоб-китоб қилишди. Нодирбек Абдусатторов 9 та партиянинг 4 тасида ғалаба қозониб, 2 тасида дуранг ўйнади. Магнус Карлсен, Уэсли Со ва Фабиано Каруанага имкониятни бой бериб қўйди. Амалдаги жаҳон чемпиони Гукеш Доммараджу, шунингдек, Ян-Криштофф Дуда, Иван Сарич ва Алиреза Фирузджани мағлубиятга учратди. Аниш Гири ва Рамешбабу Праггнанандҳа билан дурангга имзо чекди. 

Шу тариқа, Нодирбек Абдусатторов 9 имкониятдан 5 очко жамғариб, қўшимча кўрсаткичларга кўра 4-ўринни эгаллаб турибди. Учинчи ўриндан жой олган Ян-Криштофф Дуда ҳисобида ҳам 5 очко бор. Магнус Карлсен 7,5 очко билан якка пешқадам бўлиб олди. Иккинчи ўриндаги Уэсли Со 6,5 очко жамғарган. Бугун блиц баҳсларида яна 9 та партия ўтказилади.