Superunited Rapid & Blitz Croatia. Магнус 40 000, Нодирбек ва қолганлар қанча $ ишлаб олишди?

Бундан аввалги хабарда мусобақа ғолиб ва совриндорлари билан таништирган эдик. Чемпион Магнус Карлсен муваффақиятли иштирокидан 40 000 АҚШ доллари миқдорида мукофот пули ишлаб олди. Иккинчи ўринни эгаллаган америкалик Уэсли Со 30 000, учинчи ўрин соҳиби Гукеш Доммараджу 25 000 долларга эга бўлди. Олтинчи поғонадан жой олган ҳамюртимиз Нодирбек Абдусатторов эса 5 GCT очкоси ҳамда 11 000 доллар мукофот пулини қўлга киритди. Энг охирги ўринни эгаллаган сербиялик Иван Сарич ҳамёнини 7 000 долларга бойитиб олди. 

Таққослаш учун, гроссмейстеримиз май ойида ўтказилган Grand Chess Tour 2025 таснифига кирувчи — Superbet Chess Classic Romania турнирида 5-ўринни эгаллаганди. Ўшанда Нодирбек 10 кунлик меҳнатидан 6 GCT очкоси ҳамда 26 000 АҚШ доллари миқдорида мукофот пули ишлаб олган эди. 

Нуфузли "Grand Chess Tour" туркумига кирувчи мусобақаларнинг учта босқичи якунлари бўйича ҳар уччала турнирда қатнашган Рамешбабу Праггнанандҳа 110,666 доллар мукофот пули билан биринчи ўринни эгаллаган. Алиреза Фирузджа 100,166 доллар билан бу рўйхатда иккинчи, Максим Вашье-Лаграв эса 97,666 доллар билан учинчи поғонадан жой олган. Иккита босқичда қатнашган Абдусатторов эса 37 000 доллар ишлаб топган.