01 фев 08:18
Янгиликлар

Бошқалар

Талабалар киберспорт мусобақасида + ФОТО

Ўзбекистон киберспорт ассоциациясининг ташаббуси билан Тошкент шаҳрида жойлашган ОТМ талабалари ўртасида киберспортнинг уч йўналиши – “CS: GO”, “DOTA 2” ҳамда “PUBG Mobile” йўналишлари бўйича мукофот жамғармаси 100 000 000 сўм бўлган “Univerity cyber cup” турнирининг финал босқичи бўлиб ўтди.

Мусобақа “Uzcard” компаниясининг бош ҳомийлигида, шунингдек, Жисмоний тарбия ва спорт вазирлиги, Ўзбекистон Миллий олимпия қўмитаси, Ўзбекистон ёшлар иттифоқи, Ўзбекистон ёшлар ишлари агентлиги, Ўзбекистон инновацион ривожланиш вазирлиги қошидаги “Ёшлар академияси” кўмагида, қолаверса, ITV, Dr.Web, SteelSeries ташкилотлари ҳамкорлигида ташкиллаштирилди. Тадбирнинг очилиш МОҚ раиси Рустам Шоабдураҳмонов, Жисмоний тарбия ва спорт вазирининг биринчи ўринбосари Равшан Ирматов, МОҚ Бош котиби Ойбек Касимов ва раис ўринбосарлари Сакен Полатов ҳамда Азизжон Камилов ҳам иштирок этишди.

Мазкур турнирнинг саралаш мусобақалари пойтахтнинг 28 та ОТМлари талабалари ўртасида онлайн тарзда бўлиб ўтди. Саралаш ўйинларида жами 400 нафарга яқин талаба иштирок этди.

Шиддатли ҳамда муросасиз курашларга тўла ўтган турнирда: “DOTA 2” йўналишида Тошкент шаҳридаги ИНХА университети талабалари ғолибликни қўлга киритишган бўлса, “CS: GO” йўналишида Тошкентдаги Сингапур менежментни ривожлантириш институти талабаларига тенг келадигани топилмади. “PUBG Mobile” бўйича Тошкент давлат иқтисодиёт университети жамоаси барча рақибларини доғда қолдирди.

Мусобақанинг финал босқичида иштирокчиларга илҳом бағишлаш мақсадида қизиқарли кўнгилочар дастурлар, ҳомийлар томонидан тақдим этилган совғалар, шунингдек, кўргазмали чиқишлар уюштирилди.