Tata Steel Chess-2025. Абдусатторовда ғалаба, Якуббоев муросага келди

Нуфузли турнирнинг "Мастерс" гуруҳида Нодирбек Абдусатторов, "Челленжер" гуруҳида эса Нодирбек Якуббоев совринли ўринлар учун баҳс олиб боряпти. Ҳар икки ҳамюртимиз биринчи турни ҳиндистонлик рақибларига қарши ўтказишганди. Абдусатторов азалий рақибларидан бири — Рамешбабу Прагнанандха билан дурангга рози бўлган, Якуббоев эса Дивья Дешмух устидан ғалабага эришганди.

Иккинчи турда биринчи турнинг акси бўлди. Нодирбек Абдусатторов бу сафар яна бир ҳинд гроссмейстери Леон Луке Мендонсани таслим эта олди. "Челленжер" гуруҳида қатнашаётган Нодирбек Якуббоев эса қозоғистонлик Казибек Ногербек билан дурангга рози бўлди.

"Мастерс" гуруҳида 2-турдан кейин очко йўқотмаган иштирокчи қолмади. Турнирнинг биринчи тартиб рақамли шахматчиси Гукеш Доммараджу қора доналарда Владимир Федосеев билан муросага келди. Учинчи тур олдидан америкалик Фабиано Каруана 1,5 очко билан қўшимча кўрсаткичларга кўра пешқадамлик қиляпти. Кучли учликка Гукеш ва Нодирбек якун ясашган. Рамешбаба Прагнанадҳа ва Винсент Кеймер ҳисобида ҳам 1,5 очкодан бор.