Tata Steel Chess. Абдусатторовда дуранг, Якуббоев 16 ёшли рақибига ютқазди ФОТО + ЖАДВАЛ

Кеча ўтказилган 7-турда "Мастерс" гуруҳида пешқадамлик қилиб келган Нодирбек Абдусатторов қора доналарда Нидерландиянинг биринчи рақамли шахматчиси Аниш Гири билан муросага келди. Абдусатторовнинг очко йўқотишидан Гукеш Доммараджу унумли фойдаланиб қолди. Амалдаги жаҳон чемпиони оқ доналарда ҳамюрти Пентала Ҳарикришнани мағлубиятга учратди. Яна бир ҳинд гроссмейстери Рамешбабу Прагнанандҳа эса мезбон шахматчи Йорден Ван Форест билан дуранг ўйнади. 

Гукеш кечаги ғалабаси эвазига очколарини 5 тага етказиб, қўшимча кўрсаткичларга кўра пешқадамликни ўз қўлига олди. Доммараджу 6-турда Нодирбекка қарши кечган 7 соатлик партиядан мағлубиятдан қочиб кетганди. Абдусатторов 5 очко билан иккинчи ўринни эгаллаб турган бўлса, 5 очкога эга Рамешбабу кучли учликка якун ясаган. Бу уч шахматчи ҳали мағлубиятга учрамаган. Хитойлик Вей И эса 7 та партиянинг барчасида рақиблари билан дуранг қайд этган. 

"Челленжер" гуруҳида қатнашаётган Нодирбек Якуббоев (2659) эса 7-турда қора доналарда мағлубият аламини тотиб кўрди. У туркиялик 16 яшар иқтидор эгаси Эдиз Гурелга имкониятни бой берди. Бу Якуббоевнинг мусобақадаги учинчи мағлубияти бўлди. Нодирбек 7 имкониятдан 3 очко жамғариб, мусобақа жадвалида 10-поғонани банд этган. Чехиялик Ван Нгуен ва нидерландиялик Эрвин Л`ами 5 тадан очко тўплаб, "Челленжер" гуруҳида қўшҳокимлик қилишяпти.