Tata Steel Chess. Абдусатторовни юта олишмаяпти, Якуббоевда ғалаба

Кеча ўтказилган 8-турда "Мастерс" гуруҳида пешқадамлар сафида бораётган Нодирбек Абдусатторов оқ доналарда асли россиялик, ҳозирда Словения шарафини ҳимоя қилаётган Владимир Федосеев билан муросага келди. 

Абдусатторов сингари унинг асосий рақиблари ҳиндистонликлар - Гукеш Доммараджу ва Рамешбабу Прагнанандҳа ҳам ўз партияларида дуранг ўйнашди. Амалдаги жаҳон чемпиони Гукеш ватандоши Пентала Ҳарикришна билан, Рамешбабу эса германиялик Винсент Кеймер билан очколарни бўлишиб олди. 

Саккизинчи турдан кейин Гукеш, Нодирбек ва Рамешбабу 5,5 очкодан жамғариб, кучли учликдан жой олиб туришибди. Уччала гроссмейстер ҳам 3 тадан ғалаба ва 5 тадан дуранг қайд этган. Хитойлик Вей И кетма-кет 7 та дурангдан кейин ниҳоят ғалабага эришди. Чин юрти вакили қора доналарда ўйнашига қарамай, нидерландиялик Макс Вармедрамдан устун келди.   

"Челленжер" гуруҳида қатнашаётган Нодирбек Якуббоев (2659) ниҳоят ғалабага эришди. Ҳамюртимиз 8-турда оқ доналарда руминиялик Ирина Булмагани мағлубиятга учратди. Нодирбек 8 имкониятдан 4 очко жамғариб, мусобақа жадвалида 9-поғонани банд этган. Чехиялик Ван Нгуен 9-тур олдидан 6 очко билан якка пешқадам бўлиб олди. Нидерландиялик Эрвин Л`ами 5,5 очко билан иккинчи ўриндан жой олган.