Tata Steel Chess India. Магнус Карлсен чемпион бўлган турнирда Абдусатторов нечанчи ўринни эгаллади?

Ўз тарихида олтинчи бор ўтказилган нуфузли мусобақанинг мукофот жамғармаси 41 500 АҚШ долларини ташкил этди. Бугун турнирда блиц мусобақасининг қолган 9 та тури ўтказилди ва унда жаҳон рейтинги пешқадами Магнус Карлсен кутилганидек, муддатидан аввал чемпионликни қўлга киритди. 

Карлсен рапид баҳсларида ҳам чемпион бўлганди. Блиц йўналишида ҳам унга тенг келадиган шахматчи топилмади. Норвегиялик шахматчи 18 имкониятдан 13 очко тўплаб, мусобақа ғолибига айланди. Бугун Магнус Нодирбек Абдусатторов билан дурангга имзо чекди. Ҳамюртимиз 8 очко билан 7-ўрин билан кифояланди. 

Америкалик Уэсли Со 11,5 очко билан иккинчи ўринни эгаллаган бўлса, ҳиндистонлик Аржун Эрагиси 10,5 очко билан кучли учликка якун ясади. Магнус чемпион сифатида 7500 доллар мукофот пулини қўлга киритди. Нодирбек 250 долларга эга бўлди. Абдусатторов бугун ҳиндистонлик гроссмейстерлар Прагнанандҳа, Нараянан ва Видит Гужратҳини мағлубиятга учратди.