Tata Steel Chess India. Нодирбек Абдусатторов мағлубиятсиз одимламоқда

Ўз тарихида олтинчи бор ўтказилаётган нуфузли мусобақанинг мукофот жамғармаси 41 500 АҚШ долларини ташкил этади. Турнир 9 тур рапид (25+10) ва 18 тур блиц (3+2) йўналишида ўтказилади ва унда биринчи рақамли шахматчимиз Нодирбек Абдусатторов ҳам бош соврин учун баҳс олиб бормоқда. 

Рапид ва блиц йўналишлари учун алоҳида ғолиб аниқланадиган "Tata Steel Chess India" турнирида Магнус Карлсен ҳам иштирок этяпти. Айнан у кечаги иккинчи кун баҳсларидан сўнг 5 очко билан пешқадам бўлиб олди. Унинг ҳисобида 4 ғалаба ва 2 дуранг бор. Магнус кечаги 3 та партиянинг барчасида ғалаба қозонгани ҳам эътиборга молик ҳолат.  

Нодирбек эса биринчи кунги баҳслардан сўнг турнир жадвалида якка пешқадам бўлиб олганди. У кеча ўтказилган 3 та партиянинг 2 тасида дуранг натижа қайд этиб, учинчисида ғалаба қозонди. Абдусатторов 4-турда қора доналарда Ниҳал Сарин (Ҳиндистон, 2679), 5-турда оқ доналарда яна бир ҳинд гроссмейстери Видит Сантош Гужратҳи (2661) билан муросага келди. Сунилдат Нараянан (Ҳиндистон, 2579)га қарши қора доналарда ўйнашига қарамай, муҳим ғалабани қўлга киритди.

Ҳамюртимиз учинчи кун олдидан турнир жадвалида 4,5 очко билан соф иккинчи ўринни эгаллаб турибди. Америкалик гроссмейстер Уэсли Со 3,5 очко билан кучли учликка якун ясаган. Даниил Дубов ва Прагнанандҳа ҳисобида 3 тадан очко бор.