Tata Steel Chess India. Нодирбек Абдусатторов - Магнус Карлсен учрашуви бўлиб ўтди

Ўз тарихида олтинчи бор ўтказилаётган нуфузли мусобақанинг мукофот жамғармаси 41 500 АҚШ долларини ташкил этади. Турнир 9 тур рапид (25+10) ва 18 тур блиц (3+2) йўналишидан иборат бўлиб, унда биринчи рақамли шахматчимиз Нодирбек Абдусатторов ҳам бош соврин учун баҳс олиб бормоқда. 

Айни дақиқаларда мусобақанинг рапид йўналиши бўйича сўнгги 9-тур учрашувлари ўтказиляпти. Нодирбек Абдусатторов айнан 9-турда жаҳон рейтинги пешқадами Магнус Карлсенга қарши оқ доналарда ўйнади. Ёш гроссмейстеримиз ютуқли вазиятга чиқиб борган бўлса-да, якунда дурангга имзо чекди. 

Турнирда 6 ғалаба ва 3 дуранг қайд этган Магнус Карлсен 7,5 очко билан рапид баҳслари ғолибига айланди. Мусобақани зўр бошлаган ва дастлабки икки кунда ютқазмаган Нодирбек эса 5 очко билан 4-ўринга тушиб қолди. Боиси, Абдусатторов бугун ўтказилган еттинчи ва саккизинчи турларда мос равишда америкалик Уэсли Со ҳамда ҳиндистонлик Аржун Эргаисига имкониятни бой бериб қўйди.