ТАВСИЯ ҚИЛАМИЗ: UFC'нинг сўнгги 10 йилликдаги энг яхши 10 та турнири

UFC 189: МакГрегор – Мендес

Ёдда қоларлиси: Робби Лоулер – Рори МакДональд жанги, Конор МакГрегорнинг вақтинча чемпионлик унвони.

Асосий карддаги бешта жангнинг ҳеч бири ҳакамлар қароригача етиб бормаган. Шунингдек, бир нечта камбэклар. Аввалига, Томас Алмейда мағлубиятга учрай туриб, Бред Пикеттни тизза зарбаси орқали нокаут қилди. Кейин Гуннар Нельсон — тахминларга қарши бориб проспект Брэндон Татчни нокаут қилди. Сўнг октагонга Жереми Стивенс ва Деннис Бермудес чиқишди. Икки мағлубиятдан кейин, Стивенс UFCдан ҳайдалишга келиб қолган эди. Биринчи раундда Бермудес фаворит мақомини оқлаган ҳолда жангни бошқарди, аммо Стивенс иккинчи раундда босимни ошириб, учинчи раундда уни тизза зарбаси билан нокаут қилди.

Co-main event'да Робби Лоулер ва Рори МакДональд UFC тарихидаги энг яхши жанглардан бирини кўрсатишди. Жанг арғимчоқ тебранишини эслатарди. Рори яхши бошлади, аммо Лоулер ташаббусни қўлга олди. Ташаббус у томонга ўтди деганда, Рори уни хай-кик билан деярли нокаут қилди. Робби бутун бир дақиқа давомида мағлубият ёқасида бўлди, аммо ўзини йиғиб олиб, бешинчи раунд бошида МакДональдни нокаут қилди.

Ниҳоят, асосий жангда Конор МакГрегор вақтинча чемпионга айланди, гарчи жанг у учун осон кечмаган бўлса-да... Икки раунд давомида Мендес уни партерда ушлаб турди, аммо раунд охирига келиб чарчади ва МакГрегорга турган ҳолда зарба бериш имкониятини берди. ирландиялик спортчи эса бу имкониятдан унумли фойдаланиб, ғалабани илиб кетди.

UFC 194

Тарихий воқеа: МакГрегорнинг Альдони 13 сонияда мағлуб этиши

Ҳа, айнан шу турнирда тарихий нокаут рўй берган — МакГрегор 13-сонияда Альдони нокаут қилиб, UFC тарихидаги энг "оловли" рақобатлардан бирига нуқта қўйди ва чемпион бўлди.

Co-main event'да Люк Рокхолд тўртинчи раундда Крис Уайдманни мағлуб этиб, ўрта вазнда чемпионга айланди. Ўша пайтда бу вазнда янги давр бошланди деб ўйлашганди, аммо Рокхолд биринчи имкондаёқ "сўниб қолди".

Яна бир жангда "Жакаре" Соуза ва Йоэль Ромеро куч синашди — уларнинг жами 15 та кетма-кет ғалабаси бор эди. Йоэль баҳсли қарор билан ғалаба қозонди, аммо допингдан ўта олмай, дисквалификация қилинди, натижада бу ғалаба унга фойда келтирмади.

Кардни Макс Холлоуэй очиб берди — у ўз услубида Жереми Стивенсни енгди. Иккинчи жангда Демьян Майя Гуннар Нельсонга жиу-житсу сабоқларини бериб қўйди. 

UFC 199

Бу турнир UFC 200 соясида қолиши кутилган эди, аммо амалда барча жиҳатда юбилей турнирни ортда қолдирди. Прелим жанглардаёқ Брайан Ортега бой берилаётган жангда Клей Гуидани тизза зарбаси билан нокаут қилди.

Асосий кард икки нокаут билан бошланди: Дастин Порье Бобби Гринни нокаут қилди, кейин эса Дэн Хендерсон Гектор Ломбардни йиқитди.

Учинчи жангда Макс Холлоуэй Рикардо Ламасни уч раунд давомида калтаклади ва жанг охирида уруш таклиф қилди. Бу жанг орқали у мухлислар меҳри қандай қозонилишини кўрсатди.

Co-main event жангда Доминик Круз Юрайя Фейберни осонлик билан енгди. Ушбу жангдан сўнг у Фейбернинг шогирди Коди Гарбрандт билан тортишиб қолди. Кейинчалик улар ҳам ўзаро жанг қилишган.

Асосий жангда Люк Рокхолд ўзини ғолибдек тутаётганди. Лекин Биспинг биринчи раунддаёқ уни нокаут қилди. Шу сабабли, энг зўрлар билан жанглар ташкил этилишнинг ўрнига, барча Биспингнинг даъвогарлардан қочиши ва рейтингда 14-ўриндаги Хендерсон билан жанг қилишини кўрди. 

UFC 202

UFC 200дан 1,5 ой ўтиб, Конор МакГрегор Нэйт Диазга қарши реванш жангига чиқди. Бу жанг юқори даражадаги сотувни кафолатлар эди. Co-main event'да Энтони Жонсон – Гловер Тейшейра жанги бўлди. Дональд Серроне ҳам бу турнирда қатнашди.

Турнир нокаутлар ўчоғига айланди. Тим Минс Хомасини нокаут қилди, Майк Перри дебютида рақибини ерга йиқитди. Серроне Рик Сторини удумлашган комбинация билан мағлуб этди. Жонсон эса Тейшейрани 13 сонияда йиқитди.

Асосий жанг эса турнирнинг безагига айланди. Илк икки раундда МакГрегор Диазни қаттиқ дўппослади. Аммо учинчи раундда у чарчади, Диаз эса фаоллашди. МакГрегор қийин вазиятдан чиқиб кетиб, тўртинчи раундни ютди ва бешинчи раундда стратегик ҳаракат билан ғалабани мустаҳкамлади.

UFC 205

Бу — Нью-Йоркдаги биринчи турнир эди. UFC эса ММАнинг кучини намойиш қилиш имкониятни қўлдан бой бермасди. Кард ажойиб номларга эга эди. Айнан шу турнирда Хабиб - Конор қарама-қаршилиги бошланди. Хабиб Нурмагомедов Майкл Жонсонни "йўқ қилиб", Конорни жангга чақирди ва уни "жўжа" деб атади. Миша Тейт мағлубиятдан сўнг фаолиятини якунлади.

Йоэль Ромеро Уайдманни тизза зарбаси билан даҳшатли нокаут қилди. Йоанна Енджейчик Валери Летурнони тўлиқ устунлик билан енгди.

Co-main event жангда Вудли – Томпсон энг яхши жангни намойиш этиб беришди. Биринчи раундда Вудли кураш билан устунлик қилди, кейинги иккисида Томпсон. Тўртинчи раундда Вудли ғалабага яқин бўлди, бешинчида Томпсон қайта устунлик қилди. Натижа — кўпчиликнинг қарор билан дуранг қайд этилди.

Асосий жангда МакГрегор енгил вазн тоифаси чемпиони Эдди Альваресни "еб ташлади" ва тарихда икки вазнда чемпионликка эга бўлган илк жангчига айланди.

UFC 217

Орадан роппа-роса бир йил ўтиб, UFC яна Нью-Йоркка қайтди ва тарихидаги энг яхши турнирлардан бирини тақдим этди. Шоу прелим карддаёқ бошланди: Овинс Сент-Прю Кори Андерсонни оғир нокаутга учратди. Жеймс Вик Жозеф Даффини таслим этди. Асосий кард эса Пауло Коста Жонни Хендриксни нокаут қилиш билан бошлади.

Сўнгра Стивен Томпсон зарбалар алмашинувида Хорхе Масвидални "синдирди". Учинчи жангда Роуз Намаюнас сенсацион тарзда Йоанна Енджейчикни нокаут қилди. Co-main event жангда Ти Жей Диллашоу Код Гарбрандтни ўта кескин ва тортишувли жангда мағлуб этиб, камарини қайтиб олди.

"Десерт" эса Жорж Сент-Пьернинг қайтиши эди. Канадалик афсона Майкл Биспингни мағлуб этиб, ўрта вазндаги камарни қўлга киритди. Биспинг ўз вақтида фақат “пенсионерлар”га қарши унвон ҳимоя қилганлиги билан “машҳур” эди.

UFC 229

Промоушен тарихдаги энг кўп сотилган турнир. 2.4 миллион PPV! Сабаби — МакГрегор ва Хабиб Нурмагомедов ўртасидаги жанг. Бу қарама-қаршилик анча олдин шахсий даражага ўтиб кетганди. Бу — MMA тарихидаги энг катта жанг. Хабиб ғалаба қозонди ва тўсиқдан сакраб чиқиб, Диллон Дэнис билан жанжал бошлади. Буни барча эсласа керак.

Co-main event жангда Тони Фергюсон қонли тўқнашувда Энтони Петтиcни енгди. Доминик Рейес Овинс Сент-Прюни мағлуб этди, Деррик Льюис эса россиялик Александр Волковни охирги сонияларда нокаут қилди.

UFC 261

Яна бир турнир: асосий карддаги барча жанглар муддатидан олдин тугади.

Энтони Смит — Жимми Крутни шу даражада урдики, шифокор уни иккинчи раундга чиқишига рухсат бермади. Кейин Крис Уайдман — Юрайя Холлга қарши жангда оёғини синдирди, худди бир пайтлар Силва Уайдманга қарши синдирганидек.

Валентина Шевченко ўз фаолиятидаги энг зўр чиқишларидан бирини кўрсатди - Жессика Андрадени тирсак зарбалари билан мағлуб этди. Co-main event жангда Роуз Намаюнас — Вэйли Жанни хай-кик билан нокаут қилиб, камарини қайтиб олди.

Асосий жангда эса Камару Усман Хорхе Масвидални нокаут қилди.

UFC 268

Жанглар тўлиқ жавом этганига қарамай, қарорларга қарамасдан, томошабоп турнир бўлган.

Жастин Гэтжи ва Майкл Чендлер қонли ва шиддатли жанг ўтказишди — ғалаба Гэтжига берилди. Ҳеч ким бу жангни ортда қолдира олмаса керак эди, аммо Шейн Бургос ва Билл Карантилльо бунга қарши чиқишди ва янада “оловли” жанг ташкил этиб беришди. 

Марлон Вера — Фрэнки Эдгарни нокаут қилди. Co-main event жангда Роуз Намаюнас — Вэйли Жан устидан яна бир бор ғалаба қозонди. Асосий жангда эса Камару Усман — Колби Ковингтонни мағлуб этди. Колби жуда қаттиқ қаршилик кўрсатди, аммо Усман камарини муваффақиятли ҳимоя қилди.

UFC 280 

Абу-Дабида юлдузли номларга эга турнир. Шон О'Мэллининг Петр Ян устидан шубҳали ғалабаси, Стерлинг Ти Жей Диллашоуни муддатидан олдин мағлуб этган ва асосий жангда Ислам Махачев Чарльз Оливейрани бўғиш усулида мағлуб этиб, енгил вазн тоифасидаги чемпионлик камарини қўлга киритганди. 

Ушбу турнирда шунингдек ҳамюртимиз Маҳмуд Мурадов бугунги кунда шов-шув кўтаришга уринаётган Кайо Борральога қарши тўлиқ жанг ўтказиб, очколар эвазига ютқазиб қўйганди. Шунингдек, октагон ташқарисида Хамзат Чимаев Абубакар Нурмагомедов билан уришиб кетганди. Умуман олганда, UFC Абу-Дабида ўтказадиган рақамли турнирлар доимо қизиқ ўтган. 

Сиз учун яна қайси турнир ёдда қоларли бўлган?