Теннис маликаларимизнинг ҳар иккиси Уимблдон финалида!

Мусобақанинг асосий тўр баҳслари 29 июнь куни бошланиб, 12 июлга қадар давом этади. Биз учун аҳамиятлиси, аёллар ўртасидаги саралаш турнирида мамлакатимизнинг икки теннис маликаси ҳам ўз омадини синаб кўрмоқда. Кеча улар саралашнинг 1/2 финалида кортга чиқишди. 

Ўзбекистоннинг иккинчи ракеткаси Мария Тимофеева саралашнинг 1/2 финалида WTA рейтингида 144-ўринда бораётган украиналик Вероника Подрезга қарши баҳс олиб борди. Тўқсон беш дақиқа давом этган учрашувда саралаш турнирида биринчи рақам остида таснифланган вакиламиз ортиқча қийинчиликсиз рақибасини таслим этди - 6/4, 6/2. Бу теннисчиларнинг ўзаро ўтказган илк учрашуви бўлди. Иккала теннисчи ҳам 3 тадан қўшхатога йўл қўйди. Эйс зарбалари бўйича кичик устунлик Мария томонида бўлди - 2 га 1. Мария айни пайтда WTA рейтингида 92-ўринни эгаллаб турибди.  

Мамлакатимизнинг учинчи ракеткаси Полина Кудерметова ҳам саралашнинг ҳал қилувчи финалига йўл олди. Саралаш турнирида 11-рақам остида таснифланган Полина 1/2 финалда WTA рейтингида 320-поғонадан жой олган америкалик Клерве Нгунуега қарши кортга чиқди. Бор йўғи 45 дақиқа давом этган учрашувда Кудерметова 6/1, 6/2 ҳисобида зафар қучди. Полина 3, Клерве 2 та эйс зарбасини амалга оширди. Қўшхатолар бўйича АҚШ вакиласи мутлақ "устунлик" қилди - 4 га 0. Полина Кудерметова айни пайтда дунёнинг 116-ракеткаси бўлиб турибди. Бу теннисчиларнинг ўзаро ўтказган илк учрашуви бўлди. 

Бугун ҳар икки теннисчимиз асосий тўрга йўлланма берувчи саралашнинг финал баҳсида кортга чиқади. Мария Тимофеева британиялик 34 ёшли Хезер Уотсонга, Полина Кудерметова эса россиялик Алина Чараевага қарши кортга чиқади. Уотсон WTA рейтингида 491, Чараева эса 120-ўринни эгаллаб турибди Ҳар икки теннисчимиз иштирокидаги учрашув бизнинг вақт билан соат 17:00да бошланади.