Теннис янгиликлари. Ҳумоюн бугун Чехия турнири яккалигида 1/4, жуфтликда эса 1/2 финал ўйинини ўтказади. Севиль Юлдашевада нима гаплар?

Айни кунларда Чехияда теннис бўйича ITF таснифига кирувчи M25 турнири бўлиб ўтмоқда. Мазкур турнирда мамлакатимизнинг биринчи ракеткаси Ҳумоюн Султонов (429) ҳам иштирок этмоқда. Кеча наманганлик ракетка устаси яккалик баҳсларининг нимчорак финал босқичида бельгиялик Бувайсар Гадамаурига (714) қарши кортга чиқиб, 6/2, 6/1 ҳисобларида ғалаба қозонди ва чорак финалга йўл олди. Ярим финал йўлида Ҳумоюн бугун германиялик Себастиан Фанселоу билан ўйнайди. Мазкур ўйин 14:00 да старт олади.

Шунингдек, Султонов мазкур турнирнинг жуфтлик баҳсларида хорватиялик Бабич Звонимир билан иштирок этмоқда. Теннисчилар кеча чехиялик Ондрей Хонак (1548) ҳамда Даниэль Синьяков (1056) жуфтлигига қарши кортга чиқиб, 6/4, 7/6 (7:3) ҳисобларида ғалаба қозонишди. Бугун улар боливиялик Деллиен Веласко/бразилиялик Педро Сакамото жуфтлигига қарши ярим финал баҳсини ўтказади. Учрашув 17:00 га белгиланган.

Яна бир ҳамюртимиз Севиль Юлдашева (1056) эса Португалиядаги W40 турнирида иштирок этаётганди. Кеча 21 ёшли теннисчимиз 1/8 финал босқичида гонгконглик Иодис Чонгга (293) қарши кортга чиқиб, 3/6, 3/6 ҳисобларида мағлубиятга учради.

Жуфтлик баҳсларида чорак финалга қадар етиб борган Юлдашевадан кеча омад юз ўгирди. У австралиялик Елена Мичич (1120) билан ҳамкорликда ўйнаётган эди. Кеча улар канадалик Бьянка Жоли (680) ҳамда британиялик Эмма Уилсон (980) жуфтлигига қарши кортга чиқди ва 1/6, 4/6 ҳисобларида мағлубиятга учради.