TePe Sigeman 2026. Абдусатторовни юта олишмаяпти. Бугун у 14 ёшли пешқадам билан ўйнайди

Мусобақада саккиз гроссмейстер бош соврин учун баҳс олиб бормоқда. Улар орасида Нодирбек Абдусатторов ҳамда жаҳон рейтинги етакчиси норвегиялик Магнус Карлсен ҳам бор. 

Афсуски, мусобақанинг 5-турида Абдусатторов қора доналарда ўйнади ва яққол аутсайдер швециялик Нилс Гранделиусни мағлуб эта олмади. Учрашувда тезкор дуранг натижа қайд этилди. Нилс илк очкосини айнан кеча Нодирбекдан олди. Унгача швед шахматчиси барча партияларда мағлубиятга учраган эди. Ҳамюртимиз ютқазмаяпти, лекин дуранглар кўпайиб кетди.   

Абдусатторовнинг очко йўқотишидан ҳиндистонлик Аржун Эригаиси унумли фойдаланиб қолди. У оқ доналарда нидерландиялик Йорден ван Форестни таслим этди. Ўтган турда Абдусатторов билан дуранг ўйнаган Магнус Карлсен бу турда зафар қучди. Норвегиялик афсона мусобақадаги ягона аёл иштирокчи хитойлик Чжу Цзинерни енгди.     

Бешинчи турнинг сўнгги партиясида туркиялик 14 ёшли гроссмейстер Ягиз Каан Эрдоғмуш америкалик Энди Вудвард билан дуранг қайд этди. 

Бешинчи турдан сўнг Аржун Эригаиси ва Ягиз Каан Эрдогмуш 3,5 очкодан жамғариб, турнирда қўшҳокимлик қиляпти. Нодирбек Абдусатторов 3 очко билан қўшимча кўрсаткичларга кўра учинчи ўринни эгаллаб турибди. Магнус Карлсен ҳисобида ҳам 3 очко бор ва у 4-поғонани банд этган. 

Бугун 6-турда Нодирбек Абдусатторов қардош шахматчилар дербисида 14 ёшли Ягиз Каанга қарши қора доналарда ўйнайди. Бугунги учрашувлар ҳам бизнинг вақт билан соат 18:00да бошланади.