Терма жамоаларимиз функционал текширувдан ўтказилмоқда

Унинг доирасида Россия Олимпия қўмитаси ҳузуридаги инновацион марказининг тор доирадаги тажрибали мутахассислари (Павел Карнеев, Евгений Рассудихин, Анна Елисеева, Юлия Лемешева) иккинчи бор бир қатор спорт турлари бўйича терма жамоамиз вакилларини функционал текширувдан ўтказишмоқда. Жараён Миллий олимпия қўмитаси қошидаги Республика спорт тиббиёти илмий-амалий марказида ўтмоқда. Текширувларни МОҚ президенти Рустам Шоабдураҳмонов ҳам кузатиб бормоқда. Суҳбат давомида спортчилар билан юзага келиши мумкин бўлган муаммоларнинг олдини олиш, атлетларимизнинг саломатлигини жиддий назорат қилиб бориш борасида тегишли кўрсатмалар берилди.

Таъкидлаш жоиз, МОҚ раҳбари июль ойида Москвада Россия Олимпия қўмитаси ҳузуридаги инновацион маркази директори Сергей Зоткин билан учрашиб, Токио Олимпиадасига тайёргарлик доирасида ўзаро ҳамкорликда ишлаш бўйича келишиб олган эди. 

Айни пайтгача сув полоси, триатлон, дзюдо, таэквондо, спорт курашлари каби терма жамоалар текширувдан ўтган бўлса, олдинда қиличбозлик, енгил атлетика, каратэ, байдарка ва каноэчиларимиз ҳам россиялик мутахассислар кўригидан ўтиши режалаштирилган. 

Текширув давомида қон таҳлиллари олиниб,  спортчиларнинг индивидуал жисмоний ва психологик ҳолатлари бўйича чуқурлаштирилган текширув олиб борилади. Унда терма жамоадаги ҳар бир спортчининг физиогологик ҳолати, жисмоний юкламаларнинг максимал даражаси, ҳаракат вақтида юрак-қон тизимининг фаолияти, мускулларнинг ривожланиш даражаси атрофлича ўрганилади.