Тез орада Хитой бош мураббийи эълон қилинади, якуний уч номзод орасида Кападзе бор

Championat.asia сайтига маълум бўлишича, охирги номзодлар орасида италиялик собиқ футболчи Фабио Каннаваро, Ўзбекистон бош мураббийи Тимур Кападзе ва маҳаллий мураббий Чжэн Чжи ўрин олган. Энди мана шу уч номзод кўриб чиқилади.

Хитойнинг маҳаллий нашрлари ёзишича, ХФАнинг асосий устуворлиги Тимур Кападзе бўлиб турибди. ОАВ ёзишича, ташкилот аллақачон Кападзе билан алоқага чиқишга улгурган.

Ўзбекстонлик мураббийнинг ХФА мезонларига мос келишига бир неча мезонлар сабаб бўлган:

– йиллик маоши 3 млн евродан кам;

– улкан мураббийлик тажрибаси;

– ёш эканлиги;

– Осиё ва Европа футболи борасида тушунчага эга эканлиги.

Эътиборлиси, бошқа мураббийлардан фарқли ўлароқ, Кападзе Хитой мураббийлиги учун ариза топширмаган. Аксинча, аввал ХФА у билан боғланиб, уни якуний номзодлар рўйхатига киритган.

Мураббий танлови Хитой терма жамоасининг кейинги тўрт йилдаги йўналишини белгилайди. Янги мураббий жамоани нафақат жаҳон чемпионати саралаш босқичига олиб боради, балки 2030 йилги жаҳон чемпионатига ҳам тайёрлайди.

Кападзе айни дамда Ўзбекистон терма жамоаси сифатида фаолият юритади, бироқ унинг шартнома муддати тез орада якунланади. У ҳозирда ХФА таклифини жиддий кўриб чиқмоқда. Агар музокаралар муаммосиз давом этса, келаси ойдан бошлаб у расман ўз лавозимига киришиши кутилмоқда.

Аввалроқ Тимур Кападзе Хитой терма жамоаси бош мураббийи бўлиши мумкинлиги ҳақида хабар берилганди.