Тезкор. Муроджон Аҳмадалиев кейинги жангини WBA камари йўлида мексикалик "енгилмас" боксчига қарши ўтказади

WBA камари учун якуний Eliminator сифатида ўтадиган мазкур жангда Муроджон Аҳмадалиевга япониялик Томоки Камеда рақиблик қилиши зарур эди. Бироқ Камеда бошқа вазнга ўтаётгани туфайли ҳамюртимизнинг рақиби ўзгарди.

Эндиликда Муроджон "Кака" Аҳмадалиев WBA Final Eliminator жангида мексикалик Кевин Гонсалес билан тўқнаш келади. Ҳар икки жангчи келишувга эришиши учун 30 кун муддат берилди. Келишувга эришилмаган тақдирда, WBA ҳар икки боксчи учун 50 % дан гонорар тақсимланишини таклиф қилади.

Муроджон Аҳмадалиев биринчи ярим енгил вазн тоифасида WBA ва IBF йўнилишларида собиқ жаҳон чемпиони ҳисобланади. У фаолияти давомида 12 та жанг ўтказиб, уларнинг 11 тасида ғалаба қозонган, сўнгги жангида филиппинлик Марлон Тапалесга имкониятни бой берган.

Мексикалик Кевин Гонсалес эса проф боксда 26 та жанг ўтказиб, уларнинг 25 тасида ғалаба қозонган ва битта жанги дуранг билан якунланган.

Эслатиб ўтамиз, мазкур жанг ғолиби WBA камари соҳиби Марлон Тапалес ёки бўлажак даъвогар Наоя Иноуэ билан жанг қилади.