Тимур Кападзе: "Ҳаммаси ўз қўлимизда. Бу ергача етиб келиш учун футболчилар астойдил меҳнат қилишди"

"Ҳаммага салом. Албатта, эртага бизни муҳим ва қизиқарли учрашув кутиб турибди. Ҳаммамиз соғ-омонмиз. Сизларни кўриб турганимдан хурсандман", – деди Кападзе.

 "Ҳаммага салом. Сал ҳаяжон бор, чунки ҳеч қачон бундай босқич ва даврда бўлмаганмиз. 36 миллионлик халқимиз биздан ижобий натижани кутмоқда. Биз халқимиз учун катта байрам қилиб беришни режа қилганмиз. Биз ЖЧга лойиқ эканлигинимизни кўрсатиш вақти келди. Бизга осон бўлмайди, лекин ҳеч нарса тўсқинлик қилмайди деб ўйлайман. Эртага ўзбекистонлик мухлисларни хурсанд қилишга уринамиз", – деди Машарипов.

- Катта ўйиндан олдин рақибни ўрганиш жуда муҳим. БААда бош мураббий ўзгарди. Рақиб ҳақида қанчалик тушунчага эгасиз? Улардан қандай ўйин кутмоқдасиз? 

- Албатта, ўрганиб чиқдик. Ҳар тарафлама яхши тайёргарлик кўрдик. Тўғри, уларда мураббий янги. Бироқ бугун пайдо бўлиб қолмаган. Уларни ўрганишга ҳаракат қилдик. Асосийси, ўз ўйинимиз ҳақида ўйлашимиз ва яхши ўйин кўрсатишимиз лозим. 

- Биламизки, ҳозир Ўзбекистон учун муҳим давр, чунки термани 2 ўйинда 1 очко ҳам қониқтиради. Ўзингизни қандай ҳис этяпсиз? Собиқ мураббий Катанец билан алоқадамисиз? Унинг ҳолати қанақа?

- Албатта, бу даврга етиб келиш учун футболчилар астойдил меҳнат қилишди. Бизни иккита муҳим ўйин кутиб турибди. Ҳаммаси ўз қўлимизда. Эртага ғалаба қозониб, кейинги ўйинга тайёрланишимиз керак. Сречко Катанецнинг соғлиғи жойида. Унинг ёрдамчилари эса бугунги кунда менинг штабимда фаолият юритмоқда. 

- Футболчига савол. Терма жамоа лагерига катта колонкада кириб келдингиз. Қизиқ, сизнинг плейлистингиздан қандай қўшиқлар ўрин олган?

- Плейлистимдан ўзбекча, кайфиятни кўтарадиган қўшиқлар ўрин олган (кулади). Бу бизнинг кайфиятимизга таъсир қилади. Йигитлар ҳам шундай фикрда. Биз ватан ҳақида қўшиқлар тинглаймиз, чунки ватан учун ўйнамоқдамиз.