Том Аспиналл фаолиятини якунлаш муддатини айтди

Британиялик аралаш яккакураш устаси 36 ёшга тўлганидан кейин жанг қилишни режалаштирмаяпти. Бу ҳақда 32 ёшли британиялик чемпион "Angry Ginge" тахаллуси билан танилган ютубер Морган Бертвистлга берган интервьюсида маълум қилди.

"Айрим оғир вазнлилар қирқ ёшдан кейин ҳам уришади. Бу мен истаган нарса эмас. Агар ғалаба қозонсам, соғ-саломат бўлсам, давом этишни истайман. Кейин бу менга ёқиши керак, мен ўз ишимдан завқ олишим лозим - бу жуда муҳим. Бу оғир спорт тури. Ўйлашимча, бу ишни ёқтирмай қўйсанг, у билан шуғулланмасанг ҳам бўлаверади. Мен 35-36 ёшларда нуқта қўйишни истардим. Айтиш қийин. Аммо ҳозир бу менга чиндан ҳам ёқади", - деди Аспиналл.

Жорий йилнинг октябрь ойида Том Аспиналл Сирил Ганга қарши чемпионлик камарининг биринчи ҳимоясига чиқди. Биринчи раунд охирида рақиби кўзига зарба бергани учун жангни давом эттиришдан бош тортди. Яқинда британиялик бўлажак операция ҳақида хабар берди. Бу эса миш-мишларга кўра, Сирил Ган ва Алекс Перейра ўртасида вақтинчалик камар учун жанг бўлишига замин яратиб беради.