Тони Фергюсон Чендлерга мурожаат қилди

Собиқ вақтинчалик UFC чемпиони Тони Фергюсон (25-6 MMA, 15-4 UFC) собиқ Bellator чемпиони Майкл Чендлер (22-7 MMA, 1-2 UFC) билан тўқнаш келади. Ушбу жанг баҳор ёки узоғи билан ёз фаслида ташкил этилади. Жанг ҳали расман тасдиқланмаган бўлса-да, унинг иштирокчилари ижтимоий тармоқларда даҳанаки урушни бошлаб юборишган.

"Мен билан апрель ёки июнь ойида жанг қилишга тайёр бўлишингни айтдинг. Афтидан мағлубиятингни кечиктиришга уриняпсан", – дея ўзининг Твиттер саҳифасида Чендлерга мурожаат қилган Фергюсон. 

Эслатиб ўтамиз, 37 ёшли Тони Фергюсон сўнгги учта жангида Жастин Гэтжи, Чарльз Оливейра ва Бенеил Дариушга имкониятни бой берди. Унгача америкалик 12 ғалабадан иборат серияга эга бўлиб келаётганди. 

Ўз ўрнида 35 ёшли Чендлер ҳам охирги иккита жангида ютқазиб қўйди. У ҳам Тони сингари Гэтжи ва Оливейрадан "калтак" еди.