“Тошкент-2025” ёшлар Осиё ўйинларига иқтидорлар сараланмоқда

Ушбу мусобақа дастурига киритилиши кутилаётган аксарият спорт турларидан 2008-2009-йилларда туғилган ёшлар ғолиблик учун баҳс олиб боришади.

Республика Олимпия захиралари коллежида ҳозирдан ушбу мусобақаларга пухта ҳозирлик кўриш мақсадида селекция ишларига жиддий эътибор қаратилмоқда. Шу мақсадда юнон-рум кураши бўйича 2008-2009-йилларда туғилган ўсмирлар ўртасида РОЗК Очиқ чемпионати ўтказилди.

Мусобақада республикамизнинг 12та ҳудудидан (фақат Қорақалпоғистон Республикаси ва Хоразм вилояти вакиллари келишмади) жами 520 нафар иқтидорли ёшлар ғолиблик учун ўзаро беллашишди. 

Мақсад – ушбу ёш тоифасида энг иқтидорли ва кучли ёшларни саралаб олиш, уларни РОЗКга ўқишга қабул қилиш ҳамда Тошкент-2025 ёшлар Осиё ўйинларига ҳар томонлама пухта тайёргарлик кўришдан иборат.

Бу каби селекция ишлари бошқа спорт турларида ҳам амалга оширилиши белгиланган.