Тошкент “Челленжер”. Бугун Истомин эски танишига қарши кортга чиқади

Соврин жамғармаси 75 000 АҚШ долларини ташкил қилувчи ушбу турнирда бугун иккинчи давра учрашувлари бошланади. Бугун мамлакатимизнинг биринчи ракеткаси Денис Истомин чорак финал чиптаси учун кортга чиқади. 

Унинг рақиби қозоғистонлик Александр Бублик бўлади. Эски танишлар учрашуви соат 12:00дан эрта бўлмаган вақтда бошланади. Айни пайтда Денис ATP рейтингида 87, Бублик эса 217-ўринни эгаллаб турибди. Лекин қозоғистонлик теннисчи Истомин учун бироз ноқулай рақиб ҳисобланади. 

Сўнгги бор бу икки теннисчи Индонезиядаги Осиё ўйинларининг чорак финалида ўзаро тўқнаш келишган ва ўшанда Бублик иссиқ ҳаво, аниқроғи офтоб уриши натижасида баҳсни якунига етказа олмаганди. Учрашув иккинчи сетнинг учинчи геймидан сўнг тўхтатилганди. 

Биринчи сетда 6:1 ҳисобида зафар қучган Денис иккинчи сетни ҳам 3:0 ҳисобида ўз фойдасига ҳал қилаётган эди. Ундан аввалги икки учрашувда Бублик ғалаба қозонган. Яна ҳам аниқроғи, битта баҳсда ҳамюртимиз кортга чиқа олмаган.