Тошкент Челленжер. Истомин, Каримов ва Султоновнинг рақиблари маълум

Соврин жамғармаси 75 000 АҚШ долларини ташкил қилувчи ушбу турнирга қуръа ташлаш маросими бўлиб ўтди. Унга кўра, ҳамюртимиз Денис Истомин мусобақанинг иккинчи рақами остида сараланди. Денис кеча Алмати шаҳрида якунланган “Челленжер” турнирида бош совринни қўлга киритган эди. 

Қуръа натижасига кўра мамлакатимизнинг биринчи ракеткаси илк даврада италиялик Федерико Гайога қарши кортга чиқади. Денис ATP рейтингида 103, Гайо эса 227-ўринни эгаллаб турибди. Эртага эълон қилинадиган рейтингда Денис ўз ўрнини бирмунча яхшилаб олиши мумкин. 

Истеъдодли теннисчиларимиз Жўрабек Каримов ва Ҳумоюн Султоновга турнир ташкилотчилари тўғридан-тўғри асосий тўрда қатнашиш ҳуқуқини берувчи имтиёзли йўлланма тақдим этишди. 

Жўрабек биринчи босқичда турнирнинг саккизинчи ракеткаси мисрлик Муҳаммад Сафват, Ҳумоюн эса австриялик Акира Сантилян билан муносабатларига ойдинлик киритиб олади. Босниялик Мирза Башич мусобақанинг биринчи ракеткаси сифатида ҳаракат қилади.