Тошкент туманида анъанавий "Keles Open" халқаро турнири ўтказилди

Ўзбекистон Республикаси спорт вазирлиги, Тошкент вилояти спорт бошқармаси, Тошкент тумани ҳокимлиги, Ўзбекистон каратэ WKF ассоциацияси, Ёшлар ишлари агентлиги Тошкент тумани бўлими ҳамда Тошкент тумани спорт мактаби "Keles Karate" спорт клуби билан ҳамкорликда ўтказилган мазкур халқаро турнир юқори савияда ташкил этилди.

Ўзбекистон Республикаси Президентининг 2023 йил 3 ноябрдаги ПҚ- 356 сонли "Каратэ (WKF) спорт турини янада ривожлантириш чора-тадбирлари тўғрисида"ги қарори ижросини таъминлаш ҳамда иқтидорли спортчиларни саралаш орқали терма жамоаларга муносиб номзодларни аниқлаш мақсадида ташкил этилган мазкур мусобақада вилоятлар, Тошкент шаҳри ва қўшни Қирғизистон, Тожикистон давлатлардан 4 ёшдан 18 ёшгача ва 18 ёшдан катта бўлган 1000 нафарга яқин спортчилар ғолиблик учун кураш олиб боришди.

Муросасиз ва қизғин баҳсларга бой тарзда ўтган еттинчи анъанавий турнирни Тошкент тумани спорт мактаби мураббийи, "Keles Karate" спорт клуби раҳбари Дилшод Юсупов, мусобақа бош котиби Хуршид Шодибеков, бош ҳакам Санжар Мақсудов ҳамда бир гуруҳ ҳакамлар гуруҳи бошқариб боришди.

Турнир доирасида тантанали очилиш ва ғолибларни тақдирлаш маросими ҳам ташкил этилди. Юқори савияда ўтказилган ушбу тадбирда Тошкент тумани ҳокими Сардорбек Эргашев иштирок этиб, кучли учликдан жой олган ёш каратэчиларга диплом, медаль ва қимматбаҳо эсдалик совғалари топширди.

Икки кун давом этган муросасиз беллашувларнинг якуний натижалирга кўра, умумжамоа ҳисобида фахрли биринчи ўринни Тошкент вилояти жамоаси қўлга киритди. Иккинчи ўринни Тошкент шаҳри жамоаси эгаллаган бўлса, иккита учинчи ўрин Қашқадарё ва Сирдарё вилояти жамоаларига насиб этди.

Мусобақада барча вазн тоифасига кўра, ғолиб ва совриндорлар диплом, медаль ва қимматбаҳо эсдалик совғалари билан тақдирланишди.

Илҳом РАҲМОНОВ тайёрлади