Тошкентда синхрон сузиш бўйича жаҳон сериясининг сўнгги босқичи старт олди

Йил бошидан ушбу мусобақалар Париж, Пекин, Токио, Саморин, Будапешт, Мадрид, Сурраей, Лос-Анжелес шаҳарлари ҳамда Сирос оролида ташкил этилди. Навбатдаги баҳсларга айнан Тошкент шаҳри мезбонлик қилмоқда.
Халқаро сузиш федерацияси (FINA) талабига кўра, спортчилар мусобақаларда иштирок этиб рейтинг балларини тўплаб боришади ва шунга кўра, мамлакат спортчиларининг жаҳон рейтингидаги ўрни аниқланади. Ўзбекистон терма жамоаси жаҳон серияси босқичларида Пекин (Хитой), Токио (Япония) ва Сирос ороли (Греция) да бўлиб ўтган баҳсларда муваффақиятли иштирок этиб келишди.

Тошкент шаҳрида ўтказиладиган мусобақа шу йил ҳисобидан жаҳон сериясидаги сўнгги босқич бўлиб, унда Болгария, Мексика, Германия, Словакия, Қозоғистон ва Ўзбекистон спортчилари совринли ўринлар учун кураш олиб борадилар. Баҳслар 1 июлга қадар Тошкент шаҳридаги “Саховат спорт сервис” сузиш ҳавзасида бўлиб ўтади.

Мусобақа якунида синхрон сузиш бўйича FINA жаҳон серияларида иштирок этган спортчиларнинг тўплаган рейтинг балларига кўра кучли учликка кирган спортчиларга (мамлакатлар вакилларига) FINA мукофотлари тақдим этилади.