Тўймурод Адизов: "Навоий Ўзбекистон чемпионатини юқори савияда ўтказишга тайёр"

Йилнинг энг асосий мусобақасини одатдагидек юнон-рум курашчилар бошлаб беришади. Иккинчи куни эркин кураш, сўнгги куни эса аёллар кураши бўйича Ўзбекистон чемпионатининг ғолиб ва совриндорлари аниқланади. Биз Навоий олимпия захиралари коллежининг эркин кураш бўйича мураббийи Тўймурод Адизовдан мусобақага кўрилган тайёргарлик мавзусида интервью олдик. 

- Тўймурод Амруллоевич, Навоий шаҳри қаторасига иккинчи йил ҳам катталар ўртасидаги Ўзбекистон чемпионатига мезбонлик қилади. Тайёргарликлар қандай кетяпти?

- Тайёргарликларни деярли якунига етказдик. Бугун мусобақа ўтказилувчи яккакураш залимизда безаш ишлари якунланиб, курашчилар учун шай ҳолатга келтириб қўйилди. Ўтган йили ҳам Навоий шаҳри катталар ўртасидаги Ўзбекистон чемпионатини юқори савияда ташкил этиб берган эди. Бу сафар ҳам ўтган йилгидан кам бўлмайди деб ният қилиб турибмиз. Бу йилнинг энг муҳим мусобақаси. Унда Ўзбекистон терма жамоаси таркиби аниқланади. 

- Умумий учта йўналишда неча нафар курашчининг Навоийга келиши кутилмоқда?

- Жами 450 нафар курашчилар Ўзбекистон чемпионатида иштирок этиш учун рўйхатдан ўтган. 

- Мусобақа мезбони сифатида навоийлик курашчиларнинг тайёргарлиги яхши бўлдими?

- Албатта. Машғулотлар Яккакураш турларига ихтисослаштирилган болалар ва ўсмирлар спорт мактабида кунига икки маҳалдан кучайтирилган тартибда ўтказилди. Мамлакат чемпионатига кучлилар келади. Энди тайёргарлигмиз қандай бўлганини олдидаги беллашувлар аниқлаб беради.

- Аввало бу гилам, олдиндан бир нарса дейиш қийин. Шундай бўлса-да, нечта медалга умид қилаяпсизлар?

- Бор имкониятимизни ишга соламиз. Катталар ўртасидаги беллашувларда учта йўналишдан камида 10 медални кўзлаб турибмиз.  

- Ўзбекистон чемпионатида спорт курашлари юлдузларидан кимларни кўришимиз мумкин бўлади?

- Терма жамоага номзод ҳамма курашчилар шу ерда бўлади. Рио Олимпиадасининг энг ёш курашчиларидан бўлган Аббос Раҳмоновдан умидимиз катта. У вилоятимиз шарафини ҳимоя қилади. Энг катта янгиликлардан бири эркин курашимиз афсоналаридан бири, икки карра жаҳон чемпиони, уч маротаба Осиё ўйинлари ғолиби, Осиё чемпиони Дилшод Мансуровнинг катта спортга қайтаётгани бўлиб турибди. Унинг Ўзбекистон чемпионатида курашиши кутилмоқда. 

- Ўзбекистон чемпионатида неча нафар ҳакам ишлайди? Анчадан бери мусобақа йўқ. Уларга чемпионат бошланиши олдидан семинар ўтказилдими?

- Жами 30 нафар ҳакам уч йўналиш бўйича ўтказилган мамлакат чемпионатида ҳакамлик қилади. Мусобақа бошланиши олдидан халқаро тоифадаги олимпия ҳаками, Ўзбекистон спорт курашлари ассоциацияси ҳакамлар қўмитаси раиси, "Олтин ҳуштак" соҳиби Тоҳир Ғуломов ҳакамлар учун семинар ўтказдилар.